Qazaqstanda qyzylsha men kókjótelge shaldyǵý kórsetkishteri tómendedi

ASTANA.KAZINFORM – elimizde qyzylsha jáne kókjótelmen syrqattanýshylyq azaıdy. Bul týraly QR DSM Sanıtarlyq epıdemıologııalyq baqylaý komıtetiniń tóraıymy Sarhat Beısenova Ortalyq kommýnıkatsııalar qyzmetiniń brıfınginde aıtty.

– Qazirgi tańda qyzylshamen syrqattanýshylyqtyń tómendegeni jaqsy jańalyq. Máselen, aǵymdaǵy jyldyń 8 aıynda qyzylsha boıynsha syrqattanýshylyq ótken jyldyń osy kezeńimen salystyrǵanda 91 paıyzǵa tómendedi. Syrqattanǵandardyń basym bóligi bes jasqa deıingi balalar, olardyń 75 paıyzy vaktsına almaǵandar. Kókjótelge kelsek, onyń da syrqattanýshylyǵy aıtarlyqtaı tómendedi 2024 jyldyń sáıkes kezeńimen salystyrǵanda 8 azaıdy. Kókjóteldi juqtyrǵandardyń 87 paıyzy bes jasqa deıingi balalar, jáne olardyń 90 paıyzy vaktsına almaǵan, – dedi S.Beısenova.

Onyń aıtýynsha, epıdemıologııalyq jaǵdaıdy tolyq turaqtandyrý úshin maqsatty jas toptaǵy balalardy vaktsınalaý kólemin jetkilikti deńgeıge jetkizý qajet. Qazirgi ýaqytta revaktsınatsııa sharalary jalǵasyp jatyr. Qyzylshaǵa qarsy 191 myńnan astam bala, al kókjótel, dıfterııa, sirespe aýrýyna qarsy 235 myńnan astam bala qamtyldy. 

Buǵan deıin Qazaqstanda qyzylsha men kókjótelge shaldyǵý kórsetkishteri 6,8 ese tómendegenin jazǵanbyz.