Qazaqstanda qyzylsha derti byltyrǵy qarashadan beri beleń alyp barady - mınıstrlik
ASTANA. KAZINFORM – Qazaqstanda jedel respıratorlyq vırýstyq ınfektsııalar, tumaý jáne qyzylsha boıynsha epıdemıologııalyq jaǵdaı Densaýlyq saqtaý mınıstrliginiń turaqty baqylaýynda.
Aǵymdaǵy epıdemıologııalyq maýsymnyń basynan, ıaǵnı 1 qyrkúıekten bastap respýblıka boıynsha JRVI-diń 3 332 252 jaǵdaıy tirkeldi. Bul ótken maýsymnyń uqsas kezeńimen salystyrǵanda 10 paıyzǵa tómen.
Osy kezeńde zerthanalyq túrde rastalǵan tumaýdyń 3 018 jaǵdaıy anyqtaldy. Onyń ishinde A tumaýy vırýsy (H3N2) – 2 958 jaǵdaı, A tumaýy vırýsy (H1N1) – 53 jaǵdaı, V tumaýy vırýsy – 7 jaǵdaı.
Tumaýdyń aldyn alý sharalary aıasynda 2 272 739 adam vaktsınatsııalandy. Bul halyqtyń 11,13 paıyzyn quraıdy jáne Dúnıejúzilik densaýlyq saqtaý uıymynyń usynymdaryna sáıkes keledi.
Bilim berý uıymdaryndaǵy oqý protsesi shtattyq rejımde júrgizilip jatyr. Oqýshylar arasyndaǵy syrqattanýshylyq synyptaǵy oqýshylar sanynyń 20 paıyzynan aspaıdy.
Densaýlyq saqtaý mınıstrligi azamattarǵa profılaktıkalyq sharalardy saqtaýdyń mańyzdylyǵyn eske salady. Atap aıtqanda, qoldy únemi jýý, úı-jaılardy jeldetý, dymqyl tazalaý júrgizý, sondaı-aq aýrý belgileri baıqalǵan jaǵdaıda adamdar kóp jınalatyn oryndarǵa barýdy shekteý qajet.
- Sonymen qatar elimizde qyzylsha aýrýynyń tirkelýi jalǵasyp otyr. 2025 jyldyń qarasha aıynan bastap syrqattanýshylyqtyń ósýi baıqalady. Jaǵdaılar Shymkent qalasyn qospaǵanda, eldiń 19 óńirinde tirkelgen.
Syrqattanýshylardyń negizgi úlesi egilmegen halyqqa tıesili. Aýrý jaǵdaılarynyń 80 paıyzy vaktsına almaǵan adamdar arasynda anyqtalǵan. Onyń ishinde balalardyń 58 paıyzy ata-analarynyń bas tartýyna baılanysty egilmegen, - dep jazdy vedomstvodan.
Máselen, Qyzylordada qyzylsha aýrýynyń 71,1 paıyzy ekpe almaǵandar arasynan anyqtaldy.
Vaktsınatsııalaý qyzylshanyń aldyn alýdyń jalǵyz tıimdi tásili bolyp qala beredi. Densaýlyq saqtaý mınıstrligi ata-analarǵa ulttyq kúntizbege sáıkes balalardyń profılaktıkalyq ekpelerin tekserýdi jáne qajet bolǵan jaǵdaıda tirkelgen jeri boıynsha medıtsınalyq uıymdarǵa júginýdi usynady.