Qazaqstanda qyzǵaldaq julǵandarǵa 3 jylǵa deıin jaza qarastyrylǵan
ASTANA. KAZINFORM — Qazaqstanda Qyzyl kitapqa engen qyzǵaldaqtardy julý qylmystyq jaýapkershilikke ákeledi. Bul týraly zańger Baýyrjan Aıymbetov málim etti.
Onyń aıtýynsha, atalǵan másele QR Qylmystyq kodeksiniń 339-babymen retteledi.
– QR Úkimetiniń 2006 jylǵy 31 qazandaǵy qaýlysyna sáıkes, sırek kezdesetin ósimdikterdi julýǵa, olarǵa zııan keltirýge nemese ósetin ortasyn joıýǵa tyıym salynǵan. Mundaı áreketter úshin qylmystyq jaýapkershilik qarastyrylǵan, – dedi zańger Jibek Joly arnasynyń "Búgin LIVE" baǵdarlamasyna bergen suhbatynda.
Mamannyń sózinshe, jaza quqyq buzýshylyqtyń kólemi men saldaryna baılanysty belgilenedi.
– Jaza túrleri ártúrli: 3 000 aılyq eseptik kórsetkishke deıin aıyppul salý, túzeý jumystary nemese 800 saǵatqa deıin qoǵamdyq jumystarǵa tartý qarastyrylǵan. Sonymen qatar 3 jylǵa deıin bas bostandyǵyn shekteý nemese aıyrý jazasy kózdelgen. Barlyǵy jasalǵan is-árekettiń aýyrlyǵyna baılanysty anyqtalady, – dep túsindirdi Baýyrjan Aıymbetov.
Ol sondaı-aq quqyq buzýshylyqtyń qasaqana jasalýy nemese kólemi úlken bolǵan jaǵdaıda jaza qatańdaı túsetinin atap ótti. Al naqty sheshimdi sot qabyldaıdy.
– 14 jasqa tolmaǵandar qylmystyq jaýapkershilikten bosatylady. Alaıda mundaı jaǵdaıda ata-ananyń jaýapkershiligi qarastyrylady. QR Ákimshilik quqyq buzýshylyq týraly kodeksine sáıkes, ata-analarǵa 10 AEK mólsherinde aıyppul salynýy múmkin, – dedi zańger.
Aıta keteıik, Ekologııa jáne tabıǵı resýrstar mınıstri Erlan Nysanbaev elde qyzǵaldaq pen báısheshek julǵandarǵa qomaqty aıyppul salý jazasy eskerilgenin eske saldy.
