Qazaqstanda qııar men qyzanaq baǵasy qansha
ASTANA. KAZINFORM – Kóktemde tabıǵat jańaryp qana qoımaı, adamdardyń da as máziri ózgeredi. Kóbi kún jylynǵan sátte túrli kókónisten salat jasap, dastarqanǵa qoıady. Sonyń ishinde qııar men qyzanaq salaty kóptiń súıikti asyna aınalǵan. Kazinform tilshisi óńirlerdegi baǵany bilip, salystyrdy.
Baǵany salystyrý kezinde aıyrmashylyqty dál anyqtaý úshin cherrı qyzanaǵy emes, kólemi ortasha kókónis tańdaldy. Qııar kólemi de shaǵyn boldy.
Almaty qalasyndaǵy sýpermarketterde qyzanaq baǵasy ártúrli. Jylyjaıda ósirilgen, qyzyl ári kólemi ortasha kókónis baǵasy – 1 600-1 900 teńge aralyǵynda. Al iri ári qyzǵylt qyzanaqty 2 400 teńgege satyp alýǵa bolady. Bazardaǵy baǵa edáýir tómen. Qyzanaqtyń kelisi 1 150 teńgeden bastalady. Sýpermarketterde qııardyń kelisi – 900-1 200 teńge aralyǵynda. Bazardan 700-900 teńgege satyp alýǵa bolady.
Qonaev qalasynda qyzanaqtyń kelisi 1 200-1 900 teńge bolsa, qııar baǵasy – 700-1 200 teńge.
Taldyqorǵan qalasynda qyzyl qyzanaq kelisi 1 400 teńge bolsa, qyzǵylt tústisi – 1 800 teńge. Bul qalada qııardyń kelisi – 900-1 000 teńge. Kóterme bazar men bazarda qııar kelisi 500-600 teńge bolyp tur.
Óskemen qalasynda qyzanaqtyń kelisi 1 650-2 100 teńgege, qııar 1 000-1 300 teńgege satylyp jatyr.
Semeıde qyzanaqtyń kelisi 1 500 teńgeden bastalsa, qııar baǵasy – 700-1 200 teńge aralyǵynda.
Pavlodarda qyzanaqtyń kelisi baǵasy – 1 150-1 600 teńge, qııardyń kelisi – 750-1 150 teńge.
Petropavldaǵy kókónis dúkenderinde qyzanaqty 1 350-1 500 teńgege satsa, qııar baǵasy – 580-590 teńge. Sýpermarketterdegi baǵa sál joǵary. Qyzanaq baǵasy kelisine – 1 600-2 200 teńge, qııar – 700-800 teńge.
Kókshetaýda kólemi ortasha qyzanaqtyń kelisin 1 650 teńgege satyp alýǵa bolady. Іrisiniń baǵasy 2 350 teńge bolyp tur. Al qııardyń kelisi – 750-900 teńge.
Qaraǵandyda qyzanaq baǵasy – 1 300-1 700 teńge, al qııardyń kelisi – 900-1 500 teńge. Al Jezqazǵanda qyzanaqtyń kelisi – 1 400-1 800 teńge, qııar – 900-1 500 teńge.
Qostanaı qalasynda kólemi ortasha qyzanaq kelisi – 1 435 teńge, al irisi – 2 100 teńge. Bul qalada qııardyń kelisi 650 teńge bolsa, jylyjaıda ósirilgeni – 1 320 teńge. Jergilikti ónimdi munda 1 725 teńgege baǵalaıdy.
Aqtóbe qalasyndaǵy sýpermarketterde qyzanaqtyń kelisin 1 100-1 287 teńgege satyp alýǵa bolady. Qııardyń kelisi 630-770 teńge bolyp tur.
Oralda qyzanaq baǵasy – 900-1 800 teńge, al qııar – 800-1 500 teńge.
Atyraýda qyzanaqtyń kelisi – 850-900, qııar baǵasy orta eseppen – 900 teńge.
Aqtaý qalasynda qyzanaq kelisi orta eseppen – 900-1 200 teńge, qııar – 800-900 teńge.
Qyzylordada qyzanaqtyń ortasha baǵasy kelisine – 1 200 teńge, qııar – 800 teńge.
Shymkent qalasynda baǵa kókónisti qaıdan satyp alǵanyńyzǵa baılanysty ózgerip otyrady. Máselen bazarda qyzanaqtyń kelisi 1 200-2 200 teńge bolsa, sýpermarkette – 1 600-2 200 teńge. Al qıyrdyń kelisi bazarda – 700-1 200 teńge, sýpermarkette 1 500-2 000 teńge bolyp tur.
Túrkistanda qyzanaq kelisi – 1 100-1 300 teńge, qııardyń kelisi – 700-800 teńge aralyǵynda.
Taraz qalasynda qyzanaqtyń kelisi 1 300-1 600 teńge bolyp tur. Іrisin tańdasa baǵa 1 800 teńgeden bastalady. Al qııardyń kelisi bazarda 500 teńgeden bastalsa, sýpermarketterde – 700 teńge.
Satýshylardyń aıtýynsha, jaz aılaryna qaraı kókónis túri kóbeıedi. Soǵan saı bazarda qııar men qyzanaq baǵasy tómendeıdi. Baǵaǵa kókónistiń surpy, ımporttalǵan el (keıde basqa óńirden tasymaldaıdy) jáne saýda núktesi áser etedi.
Buǵan deıin Qazaqstandaǵy kartop baǵasy týraly jazyldy.