Qazaqstanda Qytaımen sý bólý kelissózderin júrgize alatyn neshe dıplomat bar

ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov Qazaqstanda Qytaımen sý bólý kelissózderin júrgize alatyn neshe dıplomat bar ekenin aıtty.

Vedomstvonyń alqa májilisinen jýrnalıster aldyna shyqqan mınıstrge transshekaralyq ózender boıynsha kelissóz júrgizetin dıplomattardyń tapshylyǵy týraly suraq qoıyldy.

- Bizdiń mınıstrliktiń quramynda transshekaralyq ózender boıynsha kelissóz júrgizetin arnaıy halyqaralyq departament bar. Onyń shtat sany 18 adam. Onyń ishinde eki basqarma bar. Bir basqarma tikeleı Qytaı Halyq Respýblıkasymen jáne Reseı Federatsııasymen kelissóz júrgizedi. Ekinshi basqarma Ortalyq Azııadaǵy tórt kórshimizben kelissóz júrgizedi, - dedi vedomstvo basshysy.

Nurjan Nurjigitovtiń sózinshe, sý dıplomatııasyn damytý úshin mınıstrliktiń ortalyq apparatyna da til biletin mamandar tartylǵan.

- Departamenttegi 18 adamnyń bireýi onyń basshysy, taǵy bir adam basshynyń orynbasary. Sonda eki basqarmada 8-8-den sý dıplomaty bar. Odan bólek mınıstrliktiń ortalyq apparatynda qytaı, aǵylshyn, túrik tilderin biletin mamandar bar. Olar da sý dıplomatııasyn damytý úshin arnaıy shaqyrtylǵan mamandar, - dedi mınıstr.

Aıta ketý kerek, Qazaqstannyń 400-ge jýyq dıplomaty álemde sırek sanalatyn tilderdi meńgergen.