Qazaqstanda Qytaı avtomobılderi ımporty artqan – sarapshy pikiri

ASTANA. KAZINFORM – Ótken jyly elimizde qytaılyq brendterdiń 50 myńǵa jýyq jańa avtokóligi satyldy. Bul otandyq avto naryqtyń tórtten birin quraıdy. Osy oraıda sarapshy Qazaqstanǵa Qytaı avtomobılderi ımportynyń joǵary kórsetkishine qatysty túsinikteme berdi. 

Aıta ketsek, elimizge árbir ekinshi kóliktiń Qytaıdan ákelitini týraly habarlaǵan edik.Bıyl qańtar-aqpan aılarynda Qytaıdan 10,1 myń avtokólik jetkizilgen.

Qazaqstan avtomobıl naryǵyn monıtorıngileý jáne taldaý agenttiginiń dırektory Artýr Mıskarıannyń aıtýynsha, mundaı statıstıkalyq derekter ádette jańa jáne paıdalanylǵan avtomobılderdi, sondaı-aq mashına jıyntyqtaryn (ıaǵnı bólshektep ákelinip Qazaqstanda jınalatyn avtomobıl-konstrýktorlar) esepke alady.

«Biraq, jalpy alǵanda, bizdiń naryqtaǵy Qytaı brendteriniń úlesi týraly aıtatyn bolsaq, ótken jyldyń qorytyndysy boıynsha qytaı brendteri elimizde 50 myńǵa jýyq avtokólikti satty. Bul ishki avtonaryqtyń shamamen 25% quraıdy», – dedi Artýr Mıskarıan elordada ótip jatqan «Automechanika Astana» avtokórmesinde.

Sarapshy aıtýynsha, qazaqstandyq naryq sheteldik kólik quraldary men avtokomponentter óndirýshilerin asa qyzyqtyrady. 

«Birinshiden, ishki naryqtyń ósýine baılanysty. Ekinshiden, qolaıly geografııalyq ornalasýyna jáne Qazaqstanda ónimdi kórshi elderge jetkizý úshin alań qurý múmkindigimen baılanysty», - deıdi ol. 

Aıta keteıik, elordada «Automechanika Astana» atty halyqaralyq avtokórme ótip jatyr. Ol avtomobıl ónerkásibiniń, dılerlik ortalyqtardyń, qyzmet kórsetý jáne jóndeý segmentteriniń ókilderin biriktiretin halyqaralyq platforma. 

Úsh kúnge (17-19 sáýir) sozylatyn avtokórmege 20 elden avtokompanııa men onyń ókilderi qatysyp jatyr.