Qazaqstanda kitaphanalardy jańa formatqa kóshirý máselesi talqylandy
«Búgingi dóńgelek ústelimizdiń taqyryby óte ózekti. Bul memleket basshysy Qasym-Jomart Toqaevtyń 22 qazanda ótken Ulttyq qoǵamdyq senim keńesiniń IV otyrysynda jasaǵan baıandamasynda kitaphanalar aǵartýshylyq rólin joǵaltpaı, zamanaýı talaptarǵa saı bolý kerektigin atap ótti. Sondaı-aq kitaphanalardyń óskeleń urpaqqa oqý mádenıetin qalyptastyrý, oqý saýattylyǵyn damytý isindegi erekshe róline toqtaldy Osyǵan oraı repýblıkalyq jáne jergilikti atqarýshy organdaryna qarasty kitaphanalar ózderiniń dástúrli qyzmet kórsetý sapasyn arttyryp, ýaqyt talaptaryna sáıkes oqyrmandardy tartýdyń jańa joldaryn izdestirý qajettiligi týyndap otyr», - deıdi QR Mádenıet jáne sport mınıstrliginiń Mádenıet jáne óner isteri departamentiniń dırektory Kúmis Seıitova.
Jastarǵa arnalǵan koýorkıng ortalyqtaryn ashý «Nur Otan» partııasynyń Tóraǵasy N.Á. Nazarbaevtyń partııany jańǵyrtý boıynsha tapsyrmasymen oryndalǵan bolatyn. Soǵan sáıkes byltyrǵy Jastar jyly qarsańynda elimizdiń barlyq aımaqtaryndaǵy kitaphanalarynda jastar koýorkıng ortalyqtary ashylǵan.
«Qazirgi kezde barlyq Qazaqstan kitaphanalary birigip, bárimiz serpilis kórsetý kerekpiz. Memleket basshysy bizge úlken senim artyp otyr. Sol senimdi aqtaý úshin, eń aldymen jastardyń kitap oqýǵa degen talpynysyn arttyrý kerek. Álbette, jastar kovorkıng ortalyqtary jastardyń ǵylym-bilimge degen qyzyǵýshylyǵyn arttyrýǵa kómekshi bir qural», - deıdi QR Ulttyq akademııalyq kitaphanasynyń dırektory Úmithan Muńalbaeva.
Koýorkıng ortalyqtary – jastar uıymdarynyń jumysyn júzege asyrýǵa múmkindik beretin ujymdyq keńse qyzmeti. Onyń negizgi maqsaty – jastarǵa dártúrli kitaphanalardyń ishinde jaǵdaı jasap, olardyń ǵylym-bilimge degen qulshynysyn arttyrý. Munda áleýmettik jobalar aıasynda jastar túrli formattaǵy is-sharalardy ótkizip, keńes alyp, ıdeıalar talqylaýǵa múmkindik alady.
