Qazaqstanda kitaphana, murajaı salalarynyń normatıvtik-quqyqtyq bazasy ázirlenedi - A.Muhamedıuly

ASTANA. QazAqparat - Qazaqstanda kitaphana, murajaı salalarynyń normatıvtik-quqyqtyq bazasy ázirlenedi. Bul týraly búgin QR PRezıdenti janyndaǵy Adam quqyqtary jónindegi komıssııanyń keńeıtilgen otyrysynda QR Mádenıet jáne sport mınıstri Arystanbek Muhamedıuly aıtty.

«Qazirgi ýaqytta mádenıettiń nazardan tys qalyp otyrǵan kitaphana, murajaı salalarynda normatıvtik-quqyqtyq baza joq. Máselen, kitaphananyń shtat sany qansha bolýy kerektigi kórsetilmegen. Tipti, ókinishke oraı, onyń mártebesi, qyzmetkerleriniń sanaty da jasalmaǵan. Biz áli kúnge keńes zamanynda jasalǵan normatıvtermen jumys istep kelemiz»,- dedi ol.

Sondyqtan da mınıstrdiń aıtýynsha, taıaýda qabyldanǵan elimizdiń mádenı saıasaty tujyrymdamasy aıasynda osy salanyń normatıvteri jasalýy kerek. Bul iske kirisken Mádenıet jáne sport mınıstrligi qazirgi ýaqytta 65 normatıvten turatyn baǵdarlama ázirleýde.

«Bizde mádenıet, ádebıet pen óner salalarynda ulttyq komıssııa joq. Bizdiń maqsatymyz - sol keńesterdi qurý», - dedi A.Muhamedıuly.

Aıta keterligi, qazirgi tańda elimizde 4185 kitaphana, 224 murajaı bar. Onyń ishinde 40 kitaphana men 1 murajaı jekemenshik. Sońǵy 10 jyldyń ishinde elimizde murajaı sany 50, kitaphana sany 20 paıyzǵa kóbeıip otyr.