Qazaqstanda qysqametrajdy fılmder baıqaýynyń jeńimpazdary irikteldi
ASTANA. KAZINFORM — Debıýttik qysqametrajdy kórkem fılmder konkýrsynyń jeńimpazdary anyqtaldy. Bul týraly Mádenıet jáne aqparat mınıstrligi málim etti.
Vedomstvonyń málimetinshe, mınıstrlik pen Sháken Aımanov atyndaǵy «Qazaqfılm» ulttyq kınostýdııasy debıýttik qysqametrajdy kórkem fılmder konkýrsynyń qorytyndysyn shyǵardy.
Baıqaý nátıjesi boıynsha óndiris kezeńine jiberý úshin eki joba irikteldi:
«Dom» — stsenarıı avtory ári rejısseri Tımýr Hoschanov;
«Kún qaıdan shyǵady?» — stsenarıı avtory ári rejısseri Aısha Sálimgereeva.
— Atalmysh baıqaý jas avtorlardy qoldaýǵa jáne otandyq kınematografııadaǵy jańa esimderdi anyqtaý maqsatynda uıymdastyryldy. Osyndaı bastamalar jas rejısserlerge ózderin tanytýǵa, jeke kórkemdik kózqarasyn kórsetýge jáne úlken kásibı jolǵa alǵashqy qadam jasaýǵa múmkindik beredi, — delingen habarlamada.
Al jyl saıynǵy kınojobalar konkýrsynda bıyl qandaı taqyryptarǵa basymdyq berilgenin myna siltemeden oqyńyz.
