Qazaqstanda qysqa daıyndyq: 42 mln tonnadan astam mal azyǵy jınaldy
ASTANA. KAZINFORM — Qazaqstan sharýashylyqtary qysqy kezeńge 42 mln tonnadan astam mal azyǵyn daıyndady. Pishen men súrlem qory jospardan asyp, aldaǵy qysta mal sharýashylyǵyn azyqpen qamtamasyz etýge negiz qalandy. Bul týraly AShM málim etti.
Oblys ákimdikteriniń málimetterine sáıkes, aýyl sharýashylyǵy taýaryn óndirýshiler mal azyǵynyń barlyq túrinen 42 mln tonnadan astam qor daıyndalǵan.
Atap aıtqanda, 26,9 mln tonna pishen daıyndaldy. Bul jospardyń 104,8%-yn quraıdy. Sonymen qatar 2,3 mln tonna pishendeme (jospardyń 99,4%-y), 2,9 mln tonna súrlem (101,8%), 4,9 mln tonna saban (103,4%) jáne 5,5 mln tonna qunarlandyrylǵan mal azyǵy (95,8%) ázirlendi.
— Mal azyǵynyń negizgi túrleri boıynsha josparly kórsetkishterdiń artyǵymen oryndalýy qosymsha qor qalyptastyrýǵa jáne aldaǵy qysqy kezeńde qolaısyz aýa raıy jaǵdaılarynyń yqtımal áserine mal sharýashylyǵy kásiporyndarynyń tótep berýine jol ashady, — delingen habarlamada.
Budan bólek, sharýashylyqtarda ótken qystatýdan qalǵan 3,6 mln tonna mal azyǵy bar. Bul qor da mal sharýashylyǵynyń qajettilikterin qamtamasyz etýge jumsalady.
Aýyl sharýashylyǵy taýaryn óndirýshilerdi mal azyǵy resýrstarymen qosymsha qamtamasyz etý maqsatynda «Azyq-túlik kelisimshart korporatsııasy» aktsıonerlik qoǵamy aldaǵy qysqy kezeńge arnap jemdik astyq qoryn qalyptastyrady. Qajet bolǵan jaǵdaıda ol rezervtik resýrs retinde paıdalanylady.
Aýyl sharýashylyǵy mınıstrligi óńirlerdiń ákimdikterimen birlesip, mal azyǵyn daıyndaý naýqanynyń qorytyndy kezeńine monıtorıng júrgizýdi jalǵastyrýda.
Atqarylyp jatqan jumystar qajetti mal azyǵy qoryn ýaqytyly qalyptastyrýǵa, mal sharýashylyǵy kásiporyndaryn jetkilikti azyqtyq bazamen qamtamasyz etýge jáne aldaǵy qys mezgilinde qorada ustaý kezeńin turaqty ótkizýge baǵyttalǵan.
Buǵan deıin Qazaqstanda 41 mln tonnadan astam jemshóp daıyndalǵanyn jazǵan edik.
