Qazaqstanda kisi óltirý oqıǵalary edáýir azaıǵan

ASTANA. QazAqparat - Elimizdegi 2014 jyldyń 3 aıyndaǵy qylmystyq ahýaly boıynsha Qazaqstanda kisi óltirý oqıǵalary edáýir azaıǵan. Bul týraly QR Bas prokýratýrasynyń baspasóz qyzmeti habarlady.

Degenmen, 2014 jyldyń 3 aıynda elimizdegi tirkelgen qylmystar deńgeıi ótken jyldyń osyndaı kezeńimen salystyrǵanda 3,2 paıyzǵa (77 073-ten 79 568-ge) ósken.

«Aýyr qylmystar deńgeıi - 19,9 paıyzǵa (8 778-den 7 028-ge), asa aýyr qylmystar- 13,8 paıyzǵa (651-den 561-ge) tómendegen. Qylmystyń mynandaı túrleri boıynsha qylmystylyq ósken: urlyq - 2,4 paıyzǵa (44 811-den 45 880-ge), buzaqylyq - 5, 8 paıyzǵa (5 545-ten 5 865-ke), alaıaqtyq - 21,9 paıyzǵa ( 7 319-dan 8 922-ge) artqan. Qylmystardyń bul túrleri jalpy tirkelgen qylmystylyqtyń negizgi bóligin (76 paıyzyn) quraıdy», - delingen vedomstvonyń habarlamasynda.

Qylmystardyń quramyndaǵy asa aýyr qylmystar úlesi - 0,7 paıyzdy (561), aýyr qylmystar - 8,8 paıyzdy ( 7 028), aýyrlyǵy ortasha qylmystar - 78,2 paıyzdy (62 239), aýyr emes qylmystar 12,3 paıyzdy (9 740) qurady.

Bul rette elimizdegi krımınogendik ahýal jalpy alǵanda turaqty dep aıtýǵa bolady, sebebi asa aýyr qylmystar deıgeıi 13,8 paıyzǵa (651-den 561-ge) sonyń ishinde kisi óltirý 21,1 paıyzǵa (275-ten 217-ge) tómendegen.

Qylmystyń ósýi elimizdiń barlyq óńirlerinde baıqaldy, tirkelgen qylmystardyń ósýi - quqyq qorǵaý organdarynda esepke alý-tirkeý tártibin retke keltirýden keıin oryn alyp otyrǵan jáıt.