Qazaqstanda kisi óltirý faktileriniń teń jartysy alkogoldi mas kúıde jasalady - mınıstr
ASTANA. QazAqparat - Qazaqstanda kisi óltirý faktileriniń teń jartysy alkogoldi mas kúıinde jasalady.
Bul týraly Májilistegi Úkimet saǵatynda QR Іshki ister mınıstri Qalmuhanbet Qasymov málim etti, dep habarlaıdy QazAqparat.
«Turmystyq qylmystyń jıi ári kúrdeli sebepteri maskúnemdik pen nashaqorlyqqa qatysty bolyp otyr. Ókinishke qaraı, tek ótken jyly alkogoldik mas kúıinde jasalǵan qylmystar sany 13 paıyzǵa artyp, 20 myńǵa jetti»,-dedi Qasymov.
Onyń sózine qaraǵanda, osyndaı qylmystar sanynyń Mańǵystaý oblysynda - 75 paıyzǵa, Almaty, Aqmola jáne Ońtústik Qazaqstan oblystarynda 50 paıyzǵa joǵarylaýy tirkeldi. Adamdar mastyqpen qylmystardyń árbir besinshisin, kisi óltirýdiń jartysyna jýyǵyn, sondaı-aq barlyq otbasylyq-turmystyq qylmystardyń 60 paıyzdan astamyn jasaıdy.
QR ІІM basshysynyń málimetinshe, búginde polıtsııa nazaryna 71 myńǵa jýyq maskúnem ilikken, onyń 10 myńnam astamy áıelder bolsa, 300-i kámeletke tolmaǵandar. Byltyr qoǵamdyq oryndarda mas kúıinde 193 myń adam ustaldy, bul kórsetkish 2015 jylǵa qaraǵanda 3 paıyzǵa kóp.
Belgili bolǵandaı, ótken jyly elimizde 348 myńnan astam qylmystyq quqyqbuzýshylyq tirkeldi, onyń 26 myńy aýyr, asa aýyr qylmystar. Munymen qosa, 853 qasaqana kisi óltirý jaǵdaıy oryn aldy.
