Qazaqstanda kıokýshınkaı karateden Álem chempıonaty ótedi
NUR-SULTAN. QazAqparat - 7-8 jeltoqsan kúnderi Nur-Sultan qalasynda kıokýshınkaı karateden Álem chempıonaty ótedi, dep habarlaıdy QazAqparat Dene shynyqtyrý jáne sport komıtetine silteme jasap.
Sporttyq sharany uıymdastyrýshylar Qazaqstannyń Jaýyngerlik óner assotsıatsııasy, sondaı-aq, 2011 jyly qurylyp, Shveıtsarııada tirkelgen «Kyokushin World Union» halyqaralyq qaýymdastyǵy.
«Kıokýshınkaı karateden ótetin Álem chempıonatynda Qazaqstan namysyn 30 sportshy qorǵaıdy. Álem Chempıonatyn qabyldaıtyn memleket retinde Qazaqstan eki qurammen (30 sportshy) óner kórsetedi. Jarys 15 salmaq dárejesi boıynsha ótedi (9-er, 6 áıel)», - dep habarlaıdy komıtetten.
Álem chempıonaty 6 salmaq dárejesi boıynsha ótkiziledi. Erler arasynda 9 (60, 65, 70, 75,80, 85, 90, 95, 95+ keli) jáne áıelder arasynda 6 sanat (50, 55, 60, 65, 70, 70+ keli) bar. KWU erejelerine sáıkes, árbir salmaq dárejesinde bir memleketten bir ǵana sportshy qatysady. Tek qabyldaýshy memlekettiń ǵana qatysýshylardyń eki quramymen shyǵýǵa quqyǵy bar. Qazaqstan Respýblıkasy Ulttyq quramasy eki quramda óner kórsetedi.
Aıta keterligi, Qazaqstannyń jaýyngerlik óner assotsıatsııasy ótken jyly qurylǵan sporttyq uıym. Onyń quramyna olımpıadalyq emes sport túrleri boıynsha 20 akkredıttelgen sporttyq federatsııa endi. Onyń basshysy bolyp Kárim Másimov saılandy.
Qaýymdastyq tórt baǵyt boıynsha: karate, jekpe-jek, tolyq kontaktili sport túrleri jáne MMA aralas jekpe-jek boıynsha jumys júrgizedi.
