Qazaqstanda kınoteatrlar 3-qabattan joǵary ornalaspaýy múmkin
ASTANA. QazAqparat - Elimizdegi oıyn-saýyq ortalyqtarynda kınoteatrlar men balalardy oınatýǵa arnalǵan oryndardy 3-qabattan joǵary ashýǵa tyıym salynýy múmkin. Mundaı usynysty QR ІІM TJK bildirip otyr, dep habarlaıdy «QazAqparat» HAA tilshisi.
Komıtettiń usynysy týraly búgingi brıfıngte Órt qaýipsizdigi salasynda baqylaý jáne profılaktıkalyq qyzmet basqarmasynyń bólim bastyǵy Ramazan Beısenǵazınov habarlady.
«Saýda ortalyqtarynda kınoteatrlardyń, balalardyń demalýyna arnalǵan aýmaqtarǵa keletin bolsaq. Búgingi kúni bul talaptardyń bári de sáýlet, qurylys jáne qala qurylysy salasyndaǵy memlekettik normatıvtermen retteledi. Demek, saýda ortalyqtaryndaǵy ondaı aýmaqtardyń birinshi nemese ekinshi qabatta ornalasýy - jobalaý satysynda (...) Kásipker tórtinshi qabattaǵy aýmaqty birinshi qabatqa aýystyra almaýy múmkin. Bunyń bári jobalaý satysynda sheshilip qoıady. Biraq, kórshiles eldegi qaıǵyly jaǵdaıdy eskere otyryp, biz sáýlet, qurylys jáne qala qurylysyna jaýapty organǵa memlekettik jáne qoǵamdyq uıymdardy tarta otyryp, jumys tobyn qurý týraly bastama, ıaǵnı usynys bildirip otyrmyz», - deıdi Ramazan Beısenǵazınov.
TJK ókiliniń aıtýynsha, dál sol oıyn-saýyq ortalyqtarynda erejelerdi qataıtý baǵyty usynylǵan. Komıtet bul usynysty qurylys normalaryna engizýge tyryspaq.
Osy rette tilshiler TJK ókiline «Demek, oıyn-saýyq ortalyqtaryndaǵy kınoteatrlar men balalar oınaıtyn aýmaqty 3-4-shi qabattan, 1-shi qabatqa aýystyrý týraly usynys bildirip jatyrsyzdar ma?» degen suraq qoıdy.
«Iá. Osy jaılardy eskere otyryp, biz jaýapty organ retinde osy usynysty bildirip otyrmyz. Atalǵan norma qazirgi kúni bilim berý mekemelerinde, mektepke deıingi mekemeler men mektepterde bar. Mysaly,bastaýysh synyptardy úshinshi qabattan joǵary oqytýǵa tyıym salynǵan. Osy talaptardyń izinshe jańa qyzmettik ǵımarattardy jeke kategorııaǵa bólinetin bolady», - deıdi TJK ókili.
foto:geekyapar.com
