Qazaqstanda kınony damytýdyń 2050 jylǵa deıingi tujyrymdamasy ázirlendi
ASTANA. QazAqparat - Qazaqstanda kıno salasyn damytýdyń 2050 jylǵa deıingi tujyrymdamasy daıarlandy. Bul týraly búgin Ortalyq kommýnıkatsııalar qyzmetindegi baspasóz máslıhatynda Qazaqstan Kınematografısteri odaǵynyń teńtóraǵasy Ahat Ybraev málim etti.
«Bul sońǵy birneshe jylda kıno salasynda ázirlengen eń mańyzdy qujattardyń biri», - dep atap ótti A. Ybraev.
Onyń aıtýynsha, daıarlanǵan tujyrymdamaǵa normatıvtik-quqyqtyq aktilerdiń tizbesi enip otyr. Osy rette bul zańnamalyq qujattar bıýdjetke júktemeni jeńildetýge múmkindik beredi.
«Tujyrymdamadaǵy eń basty baǵytqa toqtalsaq, biz jergilikti óndirýshilerge de salyqtyq jeńildikterdi qarastyryp otyrmyz», - dedi ol.
Budan bólek, ol kıno salasyndaǵylardy prokat jáne dıstrıbýtsııa júıesindegi ashyqtyq kóbinese alańdatatynyn jetkizdi.
«Tujyrymdama aıasynda biryńǵaı elektrondy júıeni engizý eskerilip otyr, bul óz kezeginde bıletter satylymyn onlaın-rejimde baıqap otyrýǵa kómektesedi. Osy baǵyttaǵy sharalar bizdiń salanyń ınvestorlar úshin tartymdylyǵyn arttyrýǵa septigin tıgizedi dep bilemin», - dedi ol.
Sonymen qatar A. Ybraev halyqaralyq yntymaqtastyqty damytý turǵysynda birneshe qadam bar ekenin sóz etti.
«Bul baǵyttaǵy máseleni sheshýdegi nusqalardyń birine toqtalsaq, «Qazaqfılm» kınostýdııasy aýmaǵynda AEA mártebesin engizý eskerilýde, sondaı-aq sheteldik óndirýshiler úshin salyqtyq jeńildikter qarastyrylmaq», - dep túıindedi sózin ol.
