Qazaqstanda kınoǵa prokat quqyǵyn berýmen aınalysatyn saraptamalyq komıssııa qurylýy múmkin

ASTANA. KAZINFORM – Mádenıet jáne aqparat mınıstrligi fılmge prokattaý kýáligin berýden buryn aldyn ala kórý quzyretin zańmen bekitpekshi. Bul týraly vedomstvonyń Kazinform saýalyna joldaǵan jaýabynda aıtylǵan.

- Mınıstrlik 2025 jylǵy Ulttyq quryltaıda Memleket basshysynyń bergen tapsyrmasy aıasynda fılmderdi keń kınoprokatqa shyǵarmas buryn aldyn ala súzgiden ótkizý sharalaryn qarastyrý úshin qoldanystaǵy zańnamany kúsheıtý jumystaryn júrgizip jatyr. Búgingi tańda «Kınematografııa týraly» Zańǵa fılmderdiń sapasyn baǵalaý boıynsha, onyń mazmunyna monıtorıng júrgizýdi retteıtin norma, fılmge prokattaý kýáligin berýden buryn fılmdi aldyn ala kórý quzyreti, fılmdi aldyn ala kórýdi júzege asyratyn saraptamalyq komıssııa qurý boıynsha, fılmniń aldyn ala kórýge joldanǵan nusqasy prokatqa shyǵatyn nusqamen birdeı bolýyn mindetteıtin normalar engizý máselesi pysyqtalyp jatyr, - dep jazylǵan mınıstrlik jaýabynda.

Vedomstvo mamandarynyń sózinshe, Qazaqstan aýmaǵynda prokatqa shyǵatyn fılmder birneshe parametr boıynsha baǵalaýdan ótpek.

- Kınoteatrlardaǵy prokatqa shyǵatyn fılmderdiń mazmunyn, kontentin belgilengen standarttarǵa, normatıvtik jáne zańnamalyq talaptarǵa sáıkestigin tekserýge múmkindik beriledi. Fılmniń mazmunyn baǵalaý balalardy zııandy aqparattan qorǵaý týraly zańdardy buzý, zorlyq-zombylyqty, ekstremızmdi, násildik nemese ulttyq tózimsizdikti nasıhattaý, qoǵamdyq moral men adamgershilik normalaryn buzý sııaqty tyıym salynǵan taqyryptarǵa tekserý úshin qajet. Zańnamany kúsheıtý nátıjesinde keleshekte fılmder súzgiden ótip, ıdeologııalyq, tildik, ulttyq ustanymdar rettelip, qazaq tiliniń shubarlanýy, azaıa túsetini sózsiz, - delingen resmı jaýapta.

Aıta ketsek, Donald Tramp AQSh-tan tys jerde shyǵarylatyn fılmderge 100% baj salyǵyn jarııalaǵanyn jazǵan edik.