Qazaqstanda qymyz ben shubat baǵasy qansha turady
Kazinform agenttigi elimizde kópshilik súıip ári tańdap ishetin sýsyn baǵasyn salystyryp kórdi.
Qymyz
Qazaqstanda qymyzdyń lıtri orta eseppen 1000 teńgeden bastalady. Al Almatyda bul sýsynda kóp mólsherde (shamamen 50 lıtr) satyp alsańyz, lıtrin 500 teńgege beredi. Jalpy Almatyda qymyzdyń ortasha baǵasy 1000-1200 teńge.
Sonymen birge kóterme baǵa Qyzylordada da tómen. Munda bir lıtr qymyzdy 800 teńgege tabýǵa bolady. Al bótelkedegi qymyz quny 1000-2000 teńge aralyǵynda. Kókshetaýda Bashqurtstannan ákelingen sýsynnyń bótelkesi 800 teńge turady. Al 1,5 lıtrlik jergilikti sýsyn quny 1700-2000 teńgeden satylyp jatyr.
Shymkenttikter qymyzdyń lıtrin 1000 teńgege satyp alady. Túrkistan dúkenderinde bótelkedegi qymyz baǵasy 1100 teńgeden bastalady.
Taraz jáne Atyraý turǵyndary shól basatyn ári emdik qasıeti bar sýsyndy 1200 teńgege (jazda baǵa 1000-1100 teńge bolady) satyp alady.
Astanada qymyzdyń lıtri orta eseppen 1200-1500 teńge turady. Qymyzdy talǵap ishetinder táttisin, ystalǵanyn tańdap qalaýyn ala alady.
Qostanaı dúkenderinde qymyz quny 1300-1400 teńge turady. Al aqtóbelikter orta eseppen 1419 teńgeden (0,5 lıtri 600-800 teńge) satyp alady.
Taldyqorǵan, Qonaev, Oral, Petropavlda qymyz quny 1500 teńgeden bastalady.
Pavlodarda bir lıtri 1500-1700 teńge, jaz aılarynda 1000-1200 teńge turady.
Óskemen men Semeıde lıtri 1700-2400 teńgeden satylady.
Qymyz quny batys pen elimizdiń ortalyǵyndaǵy keıbir qalada qymbat. Máselen Aqtaýda 1800, Qaraǵandyda 1800-2000, al Jezqazǵanda 2000-2400 teńge turady.
Shubat
Shubat baǵasy qymyzdan kem túspeıdi. Biraq keıbir qalada baǵa joǵary.
Túrkistan, Aqtaý men Almatyda shubattyń lıtri 1000 teńgeden bastalady. Taldyqorǵan men Qyzylordada odan 100 teńgege qymbat.
Taraz, Shymkent, Atyraýda shubattyń lıtri 1200 teńge. Al jaz aılarynda baǵa sál túsip, 1000-1100 teńge bolady.
Elordada shubat baǵasy — 1300 teńge.
Qostanaı, Pavlodar, Aqtóbe men Oralda shubat baǵasy 1500 teńgeden bastalady. Kóbine sýsynnyń bul túri dúkende satylady.
Petropavl turǵyndary shubattyń lıtrin 1600 teńgege satyp alady. Sonymen birge Qonaevta baǵa 1600-1700 teńge turady. Qaraǵandylyqtar shubattyń lıtrin 1600-2000 teńgege alyp júr.
Óskemen, Semeı, Jezqazǵanda baǵa joǵary. Munda shubattyń lıtri 2000-2600 teńge turady.
Eń qymbaty Kókshetaýda bolyp shyqty. Munda shubattyń lıtri 5000 teńge turady. Al 250 gramy — 1288 teńge.
Kazinform buǵan deıin shaı men kofe, qurma baǵasyn salystyrdy.