Qazaqstanda kimderdiń jalaqysy ósetini belgili boldy
ASTANA. QazAqparat - Áskerı qyzmetshilerdiń, ishki ister organdarynyń qyzmetshileriniń jalaqysy kóteriledi. Bul týraly búgin Úkimettiń selektorlyq rejimdegi otyrysynda 2017 jylǵa arnalǵan respýblıkalyq bıýdjetti naqtylaý týraly Zań jobasyna qatysty baıandama jasaǵan QR Qarjy mınıstri Baqyt Sultanov aıtty, dep habarlaıdy QazAqparat.
«Áskerı qyzmetshilerdiń, ishki ister organdarynyń qyzmetshileriniń jalaqysyn kóterýge 33,1 mlrd teńge kózdelgen. Qol jetkizilgen ekijaqty jáne ratıfıkatsııalanǵan kelisimge sáıkes, Qyrǵyz Respýblıkasyna tehnıkalyq járdem kórsetýge 14,1 mlrd teńge qarastyrylǵan», - dedi ol.
Sonymen qatar, mınıstr "Nazarbaev Ýnıversıteti" derbes bilim berý uıymyna nysanaly salymdy ulǵaıtýǵa 22,2 mlrd teńge, kórmeden keıingi is-sharalardy ótkizýge jáne EKSPO aýmaǵynda ofıster daıyndaýǵa 20 mlrd teńge somasynda qarajat kózdelgenin atap ótti.
Jalpy, Sultanovtyń deregine sáıkes, 2017 jylǵa arnalǵan respýblıkalyq bıýdjettiń naqtylanǵan túsimderi 9 691,5 mlrd teńgeni nemese JІÓ-ge 18,7 paıyz quraıdy. Onyń ishinde munaılyq emes túsimder josparǵa qaraǵanda 77,9 mlrd teńgege ósip, 4 497,2 mlrd teńge, munaı túsimderi josparǵa qaraǵanda 14,9 mlrd teńgege tómendep, 5 194,2 mlrd teńge bolady.
«Respýblıkalyq bıýdjettiń shyǵystary 2017 jyly 11 191,5 mlrd teńgeni quraıdy, ol naqtylanǵan jospardan 15,1 mlrd. teńgege kóp», - dedi ol.
