Qazaqstanda qylmystyq isterdiń 90 paıyzy elektrondyq formatta tergelip jatyr – Bas prokýror
ASTANA. KAZINFORM – Bas prokýror Berik Asylov azamattardyń konstıtýtsııalyq quqyqtaryn saqtaý jáne azaptaýlarǵa qarsy is-qımyl sharalarynyń tıimdiligine arnalǵan alqa otyrysyn ótkizdi.
- Elimizde qylmystyq protsess barysynda adam quqyqtaryn qorǵaýǵa qajetti barlyq quqyqtyq negizder qalyptastyrylǵanyn atap ótkim keledi.
Sot isin júrgizýdi tsıfrlandyrý boıynsha birqatar sharalar qabyldanyp, protsestik qujattardy resimdeý úshin JI engizilýde.
Qylmystyq isterdiń 90 paıyzdan astamy elektrondyq formatta tergep-tekserilip jatyr, - dep jazdy Bas prokýror jelidegi paraqshasyna.
Onyń sózinshe, bul qylmystyq istermen aıla-sharǵy jasaýǵa, ıaǵnı materıaldardy joıýǵa nemese túzetýge jol bermeıdi, dáleldemelerdi jınaý protsesiniń ashyqtyǵy men obektıvtiligin qamtamasyz etedi.
- Qylmystyq isterdi tergep-tekserý barysynda azamattardy zańsyz ustaý, tintý, zattardy alyp qoıýjáne áýre-sarsańǵa salý faktileri azaıdy.
Qadaǵalaý sheńberinde prokýrorlar qylmystyq qýdalaý organdarynyń 3 myńnan astam protsestik sheshimin kelisýden bas tartyp, sonyń nátıjesinde azamattardyń negizsiz qylmystyq jaýaptylyqqa tartylýyna jol berilmedi.
Biz azaptaýlardyń aldyn alý, azamattardyń jetkizilýi men ustalýy kezinde quqyqtarynyń qorǵalýy máselelerine erekshe nazar aýdaramyz, - delingen jazbada.
Birqatar óńirlerde prokýrorlar men quqyq qorǵaý organdarynyń IT-tehnologııalardy keńinen qoldaný boıynsha birlesken jumysy oń baǵalanǵan.
Mysaly, azaptaýlardy boldyrmaý maqsatynda prokýrorlar qylmystyq-atqarý júıesi mekemelerindegi (kolonııalar, túrmeler) beınebaqylaý kameralaryna tikeleı qosylady. Polıtsııa organdarynyń kireberisterine bet-álpetti taný fýnktsııasy bar beınekameralar ornatylyp, ǵımaratta 3 saǵattan astam ýaqyt bolǵan adamdardy anyqtaý tetigi iske qosylǵan.
- Azamattar kezekshi prokýrorlardyń baılanys derekterin jáne óz quqyqtary týraly ózekti aqparatty ala alatyn QR-kodtar ornalastyrylǵan.
Terrorızm qaýpi joǵary obektiler men adamdar kóp jınalatyn jerlerde krımınogendik jaǵdaıdy taldaýǵa arnalǵan «aqyldy» kameralar qosylǵan.
Prokýratýra úshin basty basymdyqtar – adam quqyqtaryn qorǵaý, azamattardyń sot tóreligine degen senimin nyǵaıtý jáne «Zań men Tártip» qaǵıdatyn ilgerileý boıynsha jumysty úılestirý, - dep atap ótti Berik Asylov.
Aıta keteıik, Bas prokýratýra toǵyz qazaqstandyq fýtbolshynyń 110 mıllıon teńgege bás tikkenin anyqtady.