ІІM keńeıtilgen alqasy: qylmys 10%-ǵa qysqardy
ASTANA. KAZINFORM — Іshki ister mınıstrliginde keńeıtilgen alqa otyrysy ótip, onda 2026 jyldyń birinshi jartyjyldyǵyndaǵy jedel-qyzmettik qyzmet qorytyndycy shyǵarylyp, aldaǵy kezeńge negizgi mindetter aıqyndaldy. Bul týraly Polisia.kz jazdy.
Otyrysty ashqan Іshki ister mınıstri Erjan Sadenov 1 shildeden bastap Qazaqstan Respýblıkasynyń jańa Konstıtýtsııasy kúshine engenin, onda «Zań men Tártip» qaǵıdaty konstıtýtsııalyq deńgeıde bekitilgenin atap ótti.
— Memleket basshysy atap ótkendeı, bul qaǵıdat memlekettik organdar men jalpy qoǵam qyzmetiniń berik negizine aınalýy tıis. Іshki ister organdary úshin bul zańdy múltiksiz saqtaý men qamtamasyz etý, quqyqqa baǵyný mádenıetin qalyptastyrý, quqyq buzýshylyqtardyń aldyn alýdy kúsheıtý jáne qylmysqa qarsy ymyrasyz kúres júrgizý degendi bildiredi. Dál osy baǵyttar Ádiletti Qazaqstandy qurýdyń basty negizi bolyp qala beredi, — dedi Erjan Sadenov.
Birinshi jartyjyldyqtyń qorytyndysy boıynsha elimizde qylmys deńgeıi 10%-ǵa azaıdy. Bul kórsetkish qylmystyń barlyq negizgi sanattary boıynsha tómendegen. Qylmystardy ashý deńgeıi jaqsaryp, jedel-izdestirý jáne tergeý jumystarynyń tıimdiligi artty. Aldyn alý sharalarynyń nátıjesinde buryn sottalǵan adamdarmen, kámeletke tolmaǵandarmen, alkogoldik masań kúıde, sondaı-aq qoǵamdyq oryndar men turmystyq-otbasylyq salada jasalǵan qylmystardyń sany azaıdy.
Memleket basshysy jarııalaǵan 2026 jyl — Tsıfrlandyrý jáne jasandy ıntellekt jyly aıasynda ishki ister organdaryn tsıfrlyq transformatsııalaý negizgi basymdyqtardyń biri retinde belgilendi. Jasandy ıntellektini keńinen qoldaný, ıntellektýaldy beınetaldaý júıelerin damytý, ushqyshsyz tehnologııalardy engizý, jedel basqarý ortalyqtarynyń múmkindikterin keńeıtý jáne patrýldik polıtsııa qyzmetkerlerin tolyqtaı smartjetondarmen qamtamasyz etý boıynsha mindetter qoıyldy.
Alqa otyrysynda jańa Konstıtýtsııanyń kúshine enýine baılanysty Memleket basshysynyń bastamasymen qabyldanǵan «Raqymshylyq týraly» zańdy iske asyrý máseleleri de qaraldy. Erjan Sadenov raqymshylyq aktisin qoldaný tıimdi profılaktıkamen, qaıta áleýmettendirýmen jáne bosatylǵan azamattardy jumyspen qamtýmen qatar júrýi tıis ekenin atap ótti. Sondaı-aq aýmaqtyq bólinisterdiń basshylaryna ákimshilik raqymshylyqty, onyń ishinde zań talaptaryna sáıkes keletin aıyppuldardy avtomatty túrde esepten shyǵarýdy qamtamasyz etý tapsyryldy.
Qylmystyq-atqarý júıesiniń jumysyna da baǵa berildi. Mınıstr qyzmettik tártipti nyǵaıtýdy, zańnyń qatań saqtalýyn qamtamasyz etýdi jáne sottalǵandardy qaıta áleýmettendirý jumysynyń tıimdiligin arttyrýdy talap etti. Erjan Sadenov qyzmettik-áskerı tártip pen zańdy nyǵaıtý máselesine erekshe nazar aýdardy.
Mınıstr vedomstvolyq baqylaýdy kúsheıtýdi talap etti. Sonymen qatar barlyq deńgeıdegi basshylarǵa qaramaǵyndaǵy bólinisterdiń tártibi úshin jeke jaýapkershilik júkteletini eskertildi. «Zań men Tártip» qaǵıdatyn nyǵaıtý qoǵamnyń qoldaýynsyz múmkin emes ekeni atap ótildi. Búginde azamattardyń basym bóligi quqyq buzýshylyqtarǵa tózbeýshilik tanytyp, belsendi azamattyq ustanym kórsetip, qoǵamdyq qaýipsizdikti qamtamasyz etýde ishki ister organdaryna qoldaý bildirip otyr.
Alqa otyrysyn qorytyndylaǵan Іshki ister mınıstri qazirgi zamanǵy polıtsııa qyzmetkeri tek quqyq qorǵaý júıesiniń ókili ǵana emes, sonymen birge memlekettik saıasattyń bóligi ekenin aıtty. Sondyqtan ishki ister organdary qoǵamdyq tártipti qamtamasyz etýmen qatar, joǵary quqyqtyq mádenıet pen zańǵa degen qurmetti dáıekti túrde qalyptastyrýy tıis.
Aıta keteıik, biz buǵan deıin aýyr jáne asa aýyr qylmystardyń ashylýy jaqsaryp, izdeýde júrgen júzdegen qylmysker ustalyp sondaı-aq birqatar uıymdasqan qylmystyq top pen zańsyz kóshi-qon arnalarynyń qyzmeti toqtatylǵanyn jazdyq.
