Qazaqstanda kıik etin qaıdan alýǵa bolady

ASTANA. KAZINFORM – Aýyl sharýashylyǵy mınıstrligi óńdeýshi kásiporyndarǵa kıik etiniń kılogramyn 1 600 teńgeden satýdy usyndy. Alaıda, agenttik tilshisi anyqtaǵandaı, elimizdegi bazar sórelerinde bul ónim ázirge joq.

Saýda jáne ıntegratsııa mınıstrligi baspasóz qyzmetiniń málimetinshe, óńirlik departamentterdiń derekteri boıynsha kıik eti bólshek saýdada satylmaıdy. Kóp jaǵdaıda sharýalar etti óńdeý tsehtaryna ótkizedi.

Aýyl sharýashylyǵy mınıstrliginiń aqparatyna sáıkes, óńdeýshi kásiporyndar kıik etin tutas týsha kúıinde aldyn ala berilgen tapsyrys boıynsha satady, al ónimniń bir bóligi konservi óndirýge jiberiledi. Kıik etinen konserv shyǵaratyn kásiporyndar qatarynda «Kýbleı» JShS, «Torǵaı et» JShS jáne «Uly dala K» JShS bar. Demek, naryqta bul ónim konservi túrinde de usynylýy múmkin.

Qazirgi tańda elimizde táýligine 4 140 kıikke deıin óńdeýge qýatty 25 et qabyldaý nysany jumys isteıdi. Barlyǵy 4 374 týshaǵa 108 veterınarııalyq anyqtama berilgen.

Eske sala ketsek, shilde aıynyń basynan beri Qazaqstanda kıik sanyn retteý maqsatynda atý júrgizilýde.

Ekologııa mınıstri Erlan Nysanbaevtyń aıtýynsha, bul sheshim Ǵylym jáne joǵary bilim mınıstrligine qarasty Zoologııa ınstıtýty ǵalymdarynyń bıologııalyq negizdemesi men Avstralııa, Fınlıandııa, Kanada, AQSh jáne OAR elderiniń jabaıy janýarlar popýlıatsııasyn turaqty basqarý tájirıbesi eskerile otyryp qabyldanǵan.

Mınıstr sonymen birge kıik etiniń sapasyna kúmándanbaýǵa shaqyrdy. Onyń aıtýynsha, ónim qatań veterınarııalyq baqylaýdan ótedi.

Buǵan deıin Batys Qazaqstan oblysynyń ǵalymdary kıik etinen shujyq ónimderin daıyndaý boıynsha ǵylymı ázirlemesin tanystyrǵan bolatyn.