Qazaqstanda kıim shyǵarý azaıdy, biraq baǵalar ósip jatyr
NUR-SULTAN. QazAqparat – Aǵymdaǵy jyldyń qańtar-shilde aılarynda kıim óndirisi qundyq máninde 22,3 mlrd teńgeni quraǵan – bul 2019 jyldyń osyndaı kezeńimen salystyrǵanda 2,3 paıyzǵa kóp.
Bul rette ónerkásip óndirisiniń ındeksi nebári 98,7 paıyzǵa jetken, bul osy salanyń jumysy keri ketip bara atqanyn kórsetedi. Bul týraly QazAqparat energyprom.kz saıtyna silteme jasap habarlaıdy.
Jalpy alǵanda, 2019 jyly óndiris kólemi 42,3 mlrd tg jetken, bul 2018 jylmen salystyrǵanda 19,8 paıyzǵa kóp.
Qazaqstan aımaqtary arasynda kıim óndirisi Almaty oblysynda (4,9 mlrd tg), odan keıin Shymkentte (3,3 mlrd tg) jáne Almatyda (3,2 mlrd tg) jaqsy damyǵan.
Ótken jylmen salystyrǵanda, ósim Shymkentte (+40,4%), sondaı-aq Jambyl oblysynda (36,8%) jáne Qyzylorda oblysynda (32,8%) baıqalǵan.
Qazaqstandyq kıim tigýshiler arasynda nárestelerge arnalǵan kıim jáne aksessýarlar óndirisi aıtarlyqtaı qysqarǵan – 44 paıyz (7,9 mln teńgege deıin). Sondaı-aq jempirler, pýlover, kardıgandar jáne trıkotajdan tigilgen basqa da kıimderdiń óndirisi 40,5 paıyzǵa, 58,1 danaǵa deıin qysqardy.
Oqýshylardyń mektep formasyn tigýshiler de úlken shyǵyn kórip otyr. Qazaqstanda koronavırýs pandemııasy saldarynan mektep formasyn kııý talaby alyndy, balalar kıimin satý 95 paıyzǵa azaıǵan.
Bul rette elimizde kıim baǵasy jyldan jylǵa qymbattap barady. Osylaısha, 2020 jyldyń qańtar-tamyz aılarynyń qorytyndysy boıynsha, bólshek saýda oryndarynda kıim baǵasy ótken jyldyń osyndaı kezeńimen salystyrǵanda 4,6 paıyzǵa ósken.
