Qazaqstanda kıim óndirisi ımportqa táýeldi
NUR-SULTAN. QazAqparat – Kıim óndirisi 2020 jyldyń 11 aıynda aıtarlyqtaı tómendedi, dep habarlaıdy QazAqparat ENEGRYPROM.KZ portalyna silteme jasap.
Svıter, jempir, kardıgan, jeletke jáne sol sekildi toqyma óndirisi jylyna 40,8%-ǵa, 90,5 myńǵa deıin qysqardy. Emizýli balalarǵa arnalǵan kıim 40,1%-ǵa, 14,6 mln teńgege azaıdy. Mashınamen nemese qolmen toqylatyn syrt kıim óndirisi 39,4%-ǵa, 87,4 myńǵa, shulyq 25,2%-ǵa, 10,7 mln-ǵa deıin qysqarǵan.
Bas kıim men qalpaqqa suranys, kerisinshe, artqan. Ósim jylyna 54,1%-dy nemese 12 mlrd teńgeni quraıdy.
Baǵasy boıynsha 2020 jyldyń 11 aıynda bir jyl burynǵymen salystyrǵanda 40,6 mlrd teńgege - 10,2%-ǵa kóbirek kıim óndirilgen. Al shynaıy ósim ótken jylmen salystyrǵanda – 3,7%.
Óńirler boıynsha Almaty oblysy, Shymkent jáne Almaty qalalary kósh bastap tur. Bul óńirlerde «Glasman» JShS, «Arlan 777» JShS, «TF Ajar» JShS, «Medıateks-N» JShS, «Texti Market» JShS, «Demeý-Arna» JShS, «Tehnoavıa-Qazaqstan» JShS, «Kazlegprom-Almaty» JShS, «Araıly» JShS, «Gaýhar» tigin fabrıkasy, «Nýrdan» kompanııasy, «Álem-BT» JShS syndy kompanııalar jumys isteıdi.
Suranys (eksport pen ishki naryqtaǵy saýda) tolyǵymen ımportshylarǵa táýeldi. Onyń ishinde, 2020 jyldyń on aıynyń málimeti boıynsha ish kıim naryǵynyń 98,9%-y, emizýli balalarǵa arnalǵan kıimniń 99,7%-y, toqylǵan syrt kıimniń 99,5%-y, svıter, jempir syndy toqyma ónimderiniń 98,8%-y, shulyqtyń 95,5%-y jáne sporttyq kıimderdiń 73,2%-y ımportqa tıesili.
Qazaqstanǵa ákelgen jeńil ónerkásip ónimi eksporttan 30 ese asyp túsedi. Sheteldik óndirýshiler elimizge 1 195 mlrd dollar turatyn taýar jetkizgen. Al qazaqstandyq eksportshylar 41 mln dollardyń ǵana taýaryn satqan. Qazirgi ýaqytta Qazaqstandaǵy tigin mekemeleri memlekettik tapsyrys esebinen qyzmetin toqtatpaı otyr. Onsyz da máz emes jaǵdaıdy pandemııa tipti qıyndatyp jiberdi.
TMD elderinen elimizge 18,1 myń tonna kıim ákelingen. Olardyń arasyndaǵy negizgi ımportshylar Ózbekstan men Reseı. Basqa elderden somasy 350,8 mln dollar turatyn 44,2 myń tonna kıim jetkizilgen. Álemniń basqa elderinen kelgen ımporttyń 85,1%-y Qytaıǵa tıesili.
2020 jyldyń qarashasynyń qorytyndysy boıynsha kıim men aıaq kıim baǵasy byltyrǵy jyldyń osy kezeńimen salystyrǵanda 5,2%-ǵa ósken. Ásirese Qyzylorda, Batys Qazaqstan jáne Soltústik Qazaqstan oblystarynda bul taýarlar aıtarlyqtaı qymbattaǵan. Syrt kıim jylyna 4,7%-ǵa, onyń ishinde erlerdiń kıimi 4,6%-ǵa, áıelderdiki - 5%-ǵa jáne balalardyń syrt kıimi 4,2%-ǵa qymbattady.
