Qazaqstanda kıim-keshek baǵasy qanshalyqty qymbattady

NUR-SULTAN. QazAqparat – Elimizde kıim óndirý kólemi artyp keledi, alaıda bul óndirister naqty tutyný deńgeıiniń tek az mólsherin ǵana qamtyp keledi, dep habarlaıdy QazAqparat energyprom.kz saıtyna silteme jasaı otyryp.

«Tolyq emes bir jylda (11 aıda) Qazaqstanǵa 576 mln dollardyń kıimi ımporttaldy. Ótken jyly Qazaqstanda 42,34 mlrd teńgeniń kıimi shyǵarylyp, bul kórsetkish aldyńǵy jyldan 19,8 paıyzǵa artyq. Inflıatsııany eskere otyryp, ónerkásiptik óndiristiń naqty ósimi 8,2 paıyzǵa jetti» delingen habarlamada.

Belgili bolǵandaı, óndirilgen ónimniń jartysyna jýyǵy Almaty oblysyna (9,51 mlrd teńge), Shymkent (4,76 mlrd teńge) pen Almaty 6,08 mlrd teńge) qalalaryna tıesili.

Atap aıtqanda, zattaı mánde syrtqy trıkotaj kıimi (85 paıyzǵa), shulyq buıymy (43,6 paıyzǵa), bas kıim (36,9 paıyzǵa), teriden jasalǵan ónimder (27,2 paıyzǵa), sondaı-aq toqyma jyly kıimder, jempir jáne ózge de ónimder (21,5 paıyzǵa) óndirisi aıtarlyqtaı ósti.

Sonymen birge, saladaǵy eleýli ósimge qaramastan, jergilikti óndiristiń úlesi qajettilik deńgeıin tolyq qamtymaı otyr.

Ótken jyldyń 11 aıynyń qorytyndysy boıynsha syrt kıim segmentinde otandyq kompanııalar suranystyń tek 1,9 paıyzyn, ishki kıim segmentinde – 1,1 paıyzyn, toqyma kıim men jempirler boıynsha 2,1 paıyzyn japty. Shulyq óndirý baǵytynda ǵana jaǵdaı birshama jaqsy boldy, otandyq óndirýshiler suranystyń 9 paıyzyn qamtýǵa qaýqarly boldy.

2019 jyldyń qańtar-qarasha aılarynda Qazaqstanǵa 576,1 mln AQSh dollaryna kıim men trıkotaj ári tekstılden jasalǵan zattar ımporttaldy. Osy oraıda TMD elderi arasynda negizgi jetkizýshiler retinde Reseı men Ózbekstan boldy, al ózge memleketter arasynda Qytaı, Túrkııa jáne Bangladesh tirkeldi.

Ótken jyldyń 12 aıynda kıim baǵasy 7,1 paıyzǵa ósti. Naqtyraq aıtqanda, erler kıimi - 7,3 paıyzǵa, áıelder kıimi – 6,7 paıyzǵa, al balalar kıimi 7,6 paıyzǵa qymbattady. Teriden jasalǵan bas kıimniń quny 6 paıyzǵa, galantereıa taýarlarynyń baǵasy 7 paıyzǵa ósti.