Qazaqstanda kıik tóldegen jańa jerler anyqtaldy
ASTANA. QazAqparat - Qazaqstannyń bıoalýantúrliligin saqtaý qaýymdastyǵy kıikterdiń barlyq úsh popýlıatsııasynyń tóldeý monıtorıngin júrgizdi, dep habarlaıdy QazAqparat.
Qaýymdastyqtyń baspasóz qyzmeti habarlaǵandaı, monıtorıng jumystaryn úsh dalalyq top 10-20 mamyr kúnderi júrgizgen.
«Bıyl 10 jylda alǵash ret ústirt bókenderiniń tóldegen oryndaryn taptyq. Ústirt popýlıatsııasy sany jaǵynan eń az (2017 jyly 2700 bas) jáne aldyńǵy jyldary izdeý jumystary nátıjesiz aıaqtalǵan edi. Bıyl spýtnıktik qarǵybaýlar kómegimen mamandar 300 kıik toptasqan jerdi tapty. Onda jańa týǵan 57 tól tabylyp, 43-ine syrǵa taǵyldy», - dedi ekologtar.
Betpaqdala popýlıatsııasyndaǵy kıikterdiń tóldeýi Yrǵyz-Torǵaı memlekettik tabıǵı rezervatynda júrgen. Onda 10 myńnan astam kıik tabylyp, 220 quralaıdyń qulaǵyna en salyndy, salmaǵy men boıy ólshendi. Sondaı-aq, aýrýǵa zertteý júrgizý maqsatynda bıomaterıaldar synamasy alyndy. Oral popýlıatsııasynyń tóldeý saraptamasy tórt jerde júrgizilip, 620 quralaı tirkeldi.
«Jalpy monıtorıng jumystary sátti júrgizildi. Kıikter jyldan-jylǵa kóbeıip keledi. Kelesi jyly kıikter sany edáýir ulǵaıady dep úmittenemiz», - dedi «Altyn Dala» tabıǵatty qorǵaý bastamasynyń halyqaralyq úılestirýshisi Shteffen Tsýter.
Dala zertteýleriniń sońynda sarapshylar toby BQO Jánibek aýdanyndaǵy Borsy kentinde Qarasha mektebiniń oqýshylarymen jáne ustazdarymen kezdesti. Balalar kıikter sanyn qalpyna keltirý, tabıǵatty zertteý týraly óz suraqtaryn qoıdy. Sondaı-aq, mektep ákimshiligi «Kıik dostary» klýbyn qurý bastamasyn kóterdi.
