Qazaqstanda kıik sanaǵyn áýeden dron kómegimen júrgizedi
QR Ekologııa, geologııa jáne tabıǵı resýrstar mınıstri Maǵzum Myrzaǵalıevtiń esebinshe, búginde Qazaqstan aýmaǵynda qalǵan kıikter sany 334 myńnyń shamasynda.
«Sońǵy kezde brakonerlermen belsendi kúres júrgizilip keletinin bilesizder. Kıik basy sanyn saqtap qalý kún tártibinde turǵan ózekti másele. Taıaýda «Kaspıı Qubyr Konsortsıýmy» kıikterge taǵatyn spýtnıkti 30 qarǵybaý tartý etti. Mundaı qarǵybaýdyń kómegimen kıikter qozǵalatyn jol baǵytyn bilip otyrýǵa bolady. Sońǵy kezde orman qoryna da shabýyl jasalyp keledi. Sondyqtan, jańa tehnologııalardyń kómegimen qorshaǵan ortany qorǵaý sharalaryn kúsheıtý kerek», - deıdi Maǵzum Myrzaǵalıev.
«Kaspıı Qubyr Konsortsıýmy» bas dırektorynyń orynbasary Qaıyrgeldi Qabyldın aldaǵy ýaqytta bıznes pen memlekettiń seriktestigi aıasynda ekologııalyq baǵdarlamalaryn áli de jalǵasatynyn jetkizdi.
«Qazaqstanda 30-40 jyl buryn kıik sany 2 mıllıonnan asatyn. Búginde olardyń sany kúrt tómendep ketti. Al keıbir kórshi memleketterde dala janýary múldem joıylyp ketti. Sondyqtan, biz osy janýarlar qoryn aman alyp qalý úshin shamamyz kelgenshe kómek kórsetemiz», - deıdi Qaıyrgeldi Qabyldın.
Onyń paıymynsha, janýarlar qoryn saqtap qalýǵa ǵalymdar men ekolog mamandar, bıznes sýbekteri de atsalysýy qajet.
Aıta keteıik, búgin synalǵan drondar shet memleketterde, ásirese, kórshiles Reseıde keńinen qoldanylyp keledi. Qanatynyń uzyndyǵy 3 metrden asatyn qondyrǵynyń salmaǵy 12 keli. Apparat aspanda 4,5 saǵatqa jyq ýaqyt qalyqtaıdy. Shamamen 100 shaqyrym alqaptaǵy kórinisti foto-vıdeoǵa túsire alady.
