Qazaqstanda kıik sanaǵy bastaldy
NUR-SULTAN. QazAqparat – Qazaqstanda kıikterdiń sanyn anyqtaý úshin tikushaqpen áýeden sanaý bastaldy, dep habarlaıdy QazAqparat Qazaqstan bıoalýantúrlilikti saqtaý qaýymdastyǵyna silteme jasap.
«14 sáýirde QBSQ qyzmetkerleri ushý aldyndaǵy daıyndyqty ótkizdi: esepteýshilerge arnalǵan trenıng júrgizildi, markerlerdi ornatý jáne esep jolaǵynyń eni belgilendi, esep marshrýttary (galstar) josparlandy. Búgin, 15 sáýirde Batys Qazaqstan jáne Qaraǵandy oblystarynda alǵashqy ushý bastaldy», - dep jazdy qaýymdastyq Facebook paraqshasynda.
Uıymnyń habarlaýynsha, esep júrgizý úshin eki top jumys isteıdi: bireýi — Betpaqdala popýlıatsııasynda, ekinshisi — Oral jáne Ústirt popýlıatsııalarynda. Esep kezinde 200-ge jýyq ushý saǵaty josparlanǵan.
«Áýe esebi jyl saıyn kıiktiń barlyq úsh popýlıatsııasynda ótkiziledi. 2020 jyly karantın shekteýlerine baılanysty áýe esebi toqtatyldy. Bul jumysty QR EGTRM orman sharýashylyǵy jáne janýarlar dúnıesi komıtetiniń «Ohotzooprom» ÓB uıymdastyrady. QBSA qyzmetkerleri memlekettik ınspektorlarmen birlesip esepke alýǵa tikeleı qatysady jáne sannyń qorytyndy esebin qamtıtyn jumystyń ǵylymı komponentin qamtamasyz etedi», - deıdi Qazaqstan bıoalýantúrlilikti saqtaý qaýymdastyǵy.
