Qazaqstanda kıbershabýyldar kezinde ınternet óshirilýi múmkin
ASTANA. KAZINFORM – «Kıberqaýipsizdik ıntsıdentteri anyqtalǵan kezde baılanys qyzmetterin kórsetýdi toqtata turý qaǵıdalaryn bekitý týraly» normatıvtik quqyqtyq aktiniń jobasy Ashyq NQA portalynda qoǵamdyq talqylaýǵa usynyldy.
Qujatty Jasandy ıntellekt jáne tsıfrlyq damý mınıstrligi ázirlegen. Vedomstvo málimetinshe, túzetýler Tsıfrlyq damý, ınnovatsııalar jáne aeroǵarysh ónerkásibi mınıstrliginiń qoldanystaǵy aktilerine júrgizilgen quqyqtyq monıtorıng nátıjesinde engizilgen.
– Qujatta baılanys jelilerindegi kıberqaýipsizdik oqys oqıǵalaryn anyqtaý, kıberqaýipsizdikti qamtamasyz etý ortalyqtarynyń Kıberqaýipsizdikti ulttyq úılestirý ortalyǵymen ózara is-qımyly, baılanys qyzmetterin kórsetýdi ýaqytsha toqtata turý týraly sheshim qabyldaý jáne olardy qalpyna keltirý tártibi aıqyndalady, – delingen joba mátininde.
Aıta keteıik, byltyr Memleket basshysy Túrki memleketteri uıymynyń HІІ sammıtinde sóz sóılep, uıym aıasynda Kıberqaýipsizdik keńesin qurýdy usynǵan edi.
Sonymen qatar bıyl naýryzda Qazaqstanda derekter men tsıfrlyq ınfraqurylymdy qorǵaýdy kúsheıtýge baǵyttalǵan jańa ulttyq standarttar bekitildi.
Eske sala keteıik, derbes derekter taralsa, qylmystyq jaýapkershilik jáne 5000 AEK kóleminde aıyppul qarastyrylady.