Qazaqstanda kıberqaýipsizdik mamandaryna arnalǵan granttar artady
ASTANA. KAZINFORM – Kıberqaýipsizdik mamandaryn daıarlaý úshin 12 joǵary oqý ornynda granttar bólindi. Bul týraly búgin Úkimet otyrysynda QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev málim etti.
- Kelesi baǵyt – derbes derekter men asa mańyzdy tsıfrlyq obektilerdi qorǵaý. Derbes derekterge qol jetkizýdi baqylaý servısine 481 tsıfrlyq júıe qosyldy. Barlyq memlekettik júıeler qamtyldy. 100 paıyzdyq nysanaly kórsetkishke qol jetkizildi. Qańtar–tamyz aralyǵynda eGov-ta 370 mln-nan astam suraý óńdeldi. Kelisimdi keri qaıtaryp alýdyń 719 myń jaǵdaıy tirkeldi. Al aqparattyq qaýipsizdiktiń jedel ortalyǵyna asa mańyzdy 432 tsıfrlyq obektiniń 130-y ǵana qosylǵan. Jyl sońyna deıin taǵy 86 obektini qosyp, qamtýdy 50%-ǵa jetkizý qajet, - dedi J.Mádıev.
Osy oraıda ol 2027 jyly qamtýdy 70%-ǵa, al 2028 jyly 90%-ǵa jetkizý kózdelgenin aıtty.
- Kıbermádenıetti de damytyp jatyrmyz. Qyrkúıek kıberqaýipsizdik aıy dep jarııalandy. Oqytý is-sharalary, kezdesýler jáne óńirlik forýmdar ótkizildi. Kıberqaýipsizdik mamandaryn daıarlaý úshin 12 joǵary oqý ornynda granttar bólingen. 2030 jylǵa qaraı granttar sanyn shamamen 16,5 myńǵa jetkizý josparlanǵan, - dedi Úkimet basshysynyń orynbasary.
Buǵan deıin habarlanǵandaı, qalalyq servısterdi basqarý boıynsha Astana tájirıbesi el óńirlerinde engiziledi.
