Qazaqstanda kıberqaýipsizdik mamandarynyń kúshin biriktirý kózdelgen
ALMATY. QazAqparat - Almatyda QR Qorǵanys jáne aeroǵarysh ónerkásibi mınıstrliginiń Aqparattyq qaýipsizdik komıteti kıberqaýipsizdik boıynsha ýákiletti ortalyqtarmen ózara yntymaqtastyq týraly 9 memorandýmǵa qol qoıdy, dep habarlaıdy QazAqparat tilshisi.
QR Qorǵanys jáne aeroǵarysh ónerkásibi mınıstrliginiń Aqparattyq qaýipsizdik komıteti tóraǵasynyń orynbasary Rýslan Abdýqalyqovtyń aıtýynsha, bul kelisimder byltyr qazanda qabyldanǵan Kıberşıt tujyrymdamasynyń bir pýnktin júzege asyrý bolyp tabylady.
«Aqparattyq qaýipsizdik - únemi qozǵalystaǵy úderis. Bizdiń mindetimiz - kıberqaýipten qorǵaný sharalaryn durys júrgizý.
Sondyqtan, Úkimet «Alataý» arnaıy ekonomıkalyq aýdanyndaǵy ınnovatsııalyq tehnologııalar parkinde ýákilettilik ortalyqtaryn qurý usynylǵan bolatyn. Qaýip týǵan jaǵdaıda qarsy tura alý kerek. Bizdiń basty maqsatymyz - kıberqaýipsizdik ortalyqtarynyń barlyq kúshin biriktirip, kúsheıtý» - dedi Rýslan Abdýqalyqov.
Qol qoıylǵan qujatqa sáıkes, taraptar arasynda aqparatty qorǵaý júıesin qurý, telekommýnıkatsııalyq qural-jabdyq óndirisi, ǵylym-bilim baǵdarlamalary salasynda ýaǵdalastyq ornady.
«Qaýipsizdik baǵdarlamalaryn ózimiz jasaýymyz kerek. Shetel ónimin paıdalanǵan kezde tolyq qorǵalǵan dep aıtýǵa bolmaıdy. Qorǵanys ónimderi Qazaqstanǵa beıimdelgen bolýy shart. Ony jasaýǵa ondaǵan jyl ketedi. Kıbershabýyl salasynda úzdikterdi jınap, bir jerge shoǵyrlandyryp jatyrmyz», - dedi Rýslan Abdýqalyqov.
«Ulttyq ınnovatsııalyq ortalyq» JShS, «KBC Technology» JShS, «Juni per Soft» JShS, «KazTeleport» AQ, «Korporatsııa Svıaz» JShS ózara kelisimge keldi.
«Osyndaı ýaǵdalastyqtyń arqasynda kıberqaýipsizdiktiń úzdik tehnologııalaryn ınnovatsııalyq tehnologııalar parkindegi kásiporyndarǵa jetkizemiz. Bul bizdiń bıznespen baılanysymyzdy nyǵaıtpaq», - dedi Rýslan Abdýqalyqov.
