Qazaqstanda QHR jáne basqa da elderden kelgen azamattarǵa monıtorıng jalǵasýda

NUR-SULTAN. QazAqparat - QHR men shekaralas memleketterden kelgen azamattarǵa monıtorıng jalǵasýda. Bul týraly QR Densaýlyq saqtaý mınıstrliginiń Facebook-tegi habarlamasynda aıtylǵan, dep habarlaıdy QazAqparat tilshisi.

Vedomstvo málimetinshe, 7 naýryzdaǵy jaǵdaı boıynsha barlyǵy 72 adam dene qyzýymen jáne JRVI-men, onyń ishinde 1 «B» sanaty boıynsha – 16 adam; 2-sanat boıynsha – 31 adam; 3-sanat boıynsha – 25 adam emdeýge jatqyzyldy. Emdeýge jatqyzylǵan 72 adamnyń ishinen 26 adam shyǵaryldy.

Jalpy, 3 myń 676 adam monıtorıngpen qamtyldy, onyń ishinde 1 «a» sanaty boıynsha – 763, 1 «b» sanaty boıynsha – 216, 2 sanat boıynsha 2 697 adam medıtsınalyq baqylaýda boldy.

Jalpy álemde koronavırýs ınfektsııasyna shaldyǵýdyń 21 181 oqıǵasy tirkeldi. Al Qytaıda 80 819 koronovırýs jaǵdaıy belgili boldy. Emdelip shyqqan adamdar sany 55 477-ge jetti. Statsıonarlarda 22 263 adam em-dom sharalarymen qamtylǵan.

«Respýblıkada qoldaýshy terapııa úshin qajetti dárilik zattar men medıtsınalyq maqsattaǵy zattar bar. Infektsııalyq aýrýhanalarda oqshaýlaýǵa arnalǵan bokstar jasaqtalǵan, sondaı-aq dárigerlik jáne orta medıtsınalyq personal daıyndalǵan. Bul jaǵdaı QR Densaýlyq saqtaý mınıstrliginiń turaqty baqylaýynda ekenin atap ótý qajet», - delingen vedomstvo habarlamasynda.