Qazaqstanda kezindegi kommýnıstik nyshannan aıyrylmaı turǵan ataýlar az emes - B. Aıaǵan

ASTANA. 1 qazan. QazAqparat - Qazaqstanda kezindegi kommýnıstik nyshannan aıyrylmaı turǵan ataýlar az emes. Búgin Astanadaǵy «Qazmedıa ortalyǵynda» ótken baspasóz máslıhatynda Ulttyq tarıhty zerdeleý jónindegi vedomstvoaralyq komıssııasynyń múshesi, Memleket tarıhy ınstıtýtynyń dırektory Búrkitbaı Aıaǵan osylaı málimdedi.

«Qazaqstandaǵy eldi mekender attaryn aýystyrý - asa salmaqtylyqty qajet etetin dúnıe. Bul baǵytta negizinen quqyqtyq alańda áreket etý qajet. Al jergilikti jerlerdiń tarıhı ataýyn qalpyna keltirýdiń ózindik normalary, erejeleri bar. Óz halqynyń tarıhyn tereń zertteıtin tarıhshy retinde jeke óz pikirime kelsek, buny ataý aýystyrý dep emes, tarıhı ataýlaryn qaıtarý dep qaraý kerek der edim. Osy turǵydan alǵanda, meniń oıymsha, Qazaqstannyń aýmaǵynda áli kúnge deıin kommýnıstik nyshandy saqtap qalǵan ataýlar barshylyq. Tipti el tarıhynda sonshalyqty jaǵymsyz rólderdi atqarǵan tulǵalardy ulyqtaý úshin qoıylǵan ataýlar da az emes», - deıdi Búrkitbaı Aıaǵan.

Onyń aıtýynsha, bul másele tek quqyqtyq aıada sheshimin tabýy shart.