Qazaqstanda keıingi 10 jylda neke sany 22%-ǵa azaıdy
ASTANA. KAZINFORM – Ulttyq statıstıka bıýrosy Halyqaralyq otbasy kúnine oraı Qazaqstandaǵy neke statıstıkasyn jarııalady.
Málimetke sáıkes, 2015 jylmen salystyrǵanda 2025 jyly tirkelgen neke sany 148,8 myńnan 116 myńǵa deıin tómendegen. Osylaısha, keıingi on jylda nekeler sany shamamen 22%-ǵa azaıǵan.
Sonymen qatar nekelesý koeffıtsıenti de tómendegen. Eger 2015 jyly ár 1000 adamǵa 8,48 neke tirkelse, 2025 jyly bul kórsetkish 5,69 bolǵan.
- Óńirler arasynda eń joǵary nekelesý koeffıtsıenti Astana qalasynda tirkelgen – 1000 adamǵa 6,75 neke.
Eń tómen kórsetkish Qyzylorda oblysynda – 5,06 jáne Batys Qazaqstan oblysynda – 5,1, - delingen aqparatta.
Sarapshylar muny elordadaǵy jastar kóshi-qonynyń joǵary bolýymen jáne eńbekke qabiletti halyqtyń shoǵyrlanýymen baılanystyrady.
Bıýronyń málimetinshe, sońǵy 20 jyldaǵy nekelesýdiń eń joǵary kórsetkishi 2012-2013 jyldary tirkelgen. Ol kezde ár 1000 adamǵa shaqqanda 9,8-9,9 neke rásimdelgen.
Al 2005 jyly nekelesý koeffıtsıenti 8,12 bolǵan.
Mamandar nekeler sanynyń azaıýyna demografııalyq faktorlardyń da áser etkenin aıtady. Atap aıtqanda, 1990 jyldardyń sońynda týý kórsetkishi tómen bolǵan býyn qazir neke jasyna jetken.
Sonymen qatar qazaqstandyqtardyń nekege kesh turý úrdisi baıqalady.
Sońǵy 10 jylda alǵashqy nekege turýdyń ortasha jasy erler arasynda 0,7 jylǵa, áıelder arasynda 0,6 jylǵa ósken.
2025 jyly erlerdiń alǵashqy nekege turýynyń ortasha jasy 27,9 jas bolsa, áıelderde 25,3 jasty quraǵan.
Aıta keteıik, SQO-da jyl basynan beri 750 jup nekesin tirkedi.
