Qazaqstanda keıingi 10 jylda balalar sany 1,5 mıllıonǵa artqan
ASTANA.KAZINFORM – Bul týraly Oqý-aǵartý mınıstrliginiń ókilderi Ortalyq kommýnıkatsııalar qyzmetiniń alańynda «Qazaqstan balalary» atty 2026–2030 jyldarǵa arnalǵan tujyrymdamany tanystyrý barysynda málim etti.
Mınıstrliktiń baspasóz qyzmetiniń habarlaýynsha, Qazaqstanda shamamen 6,9 mln bala turady, bul el halqynyń jalpy sanynyń 34 paıyzy. Sońǵy 10 jylda balalar sany 1,5 mln-ǵa artqan. Bul turaqty demografııalyq ósimdi jáne balalyq shaq salasyndaǵy júıeli memlekettik saıasattyń ózektiligin kórsetedi.
Osy rette mınıstrlik ókilderi «Qazaqstan balalary» Tujyrymdamasynyń Memleket basshysynyń tapsyrmasymen Bala quqyqtary jónindegi ýákilmen jáne tıisti memlekettik organdarmen birlesip ázirlengenin atap ótti.
Alǵash ret balalardyń qaýipsizdigin qamtamasyz etýge, bilim alýǵa, densaýlyǵyn qorǵaýǵa, sondaı-aq otbasyn qoldaý men áleýmettik qorǵaýǵa baǵyttalǵan barlyq qoldanystaǵy sharalar men baǵdarlamalar bir júıeli qujatqa biriktirildi.
Tujyrymdama bala quqyqtarynyń negizgi baǵyttaryn qamtıtyn tórt basym baǵyttan turady. Olar balalardyń qaýipsizdigi, sapaly bilim alý quqyǵy, densaýlyqty qorǵaý, sondaı-aq otbasy jáne áleýmettik qorǵaý salasyndaǵy quqyqtar. Tujyrymdamanyń tıimdiligin baǵalaý úshin 10 ındıkator aıqyndalyp, ony iske asyrý 158 is-shara arqyly qamtamasyz etiledi.
Qujatta balalardyń qaýipsizdigi máselelerine erekshe nazar aýdarylǵan. Elde psıhologııalyq qoldaý ortalyqtary jumys isteıdi, barlyq mektepterde qaýipsizdik sabaqtary engizilgen, «111» baılanys ortalyǵy qyzmet kórsetýde.
Tujyrymdama aıasynda zorlyq-zombylyqtan zardap shekken balalarǵa kómek kórsetý ınfraqurylymyn odan ári damytý, táýekelderdi erte anyqtaýǵa arnalǵan tsıfrlyq quraldardy engizý, sondaı-aq psıhologııalyq jáne mentorlyq súıemeldeýdi keńeıtý josparlanǵan.
Tujyrymdamanyń jeke bólimi tsıfrlandyrýǵa arnalǵan. 2027 jyldan bastap mGov platformasynda memlekettik qoldaý sharalaryn biryńǵaı esepke alýdy jáne otbasylardyń qaıta júginýinsiz balany vedomstvoaralyq súıemeldeýdi qamtamasyz etetin «Balanyń joly» tsıfrlyq júıesi engiziledi.
Bilim berý salasynda mektepke deıingi jáne ınklıýzıvti bilim berýdi damytý, ınfraqurylymdy jańǵyrtý, bilim berý uıymdarynyń sapasy men jaýapkershiligin arttyrý jumystary jalǵasady. Áleýmettik salada balalar úılerindegi tárbıeleý modelinen otbasylyq ornalastyrý nysandaryna kóshýge, tálimgerlikti damytýǵa jáne ataýly qoldaýǵa basymdyq beriledi.
«Qazaqstan balalary» tujyrymdamasyn iske asyrý balalardyń quqyqtary men ál-aýqatyn qorǵaýdyń tutas ári ornyqty júıesin qalyptastyrýǵa, áleýmettik jáne bilim berý qyzmetterine teń qoljetimdilikti qamtamasyz etýge, árbir balanyń damýyna qaýipsiz orta qurýǵa jáne uzaq merzimdi áleýmettik táýekelderdi azaıtýǵa múmkindik beredi.
Eske sala keteıik, bıyl 27 qańtarda QR Úkimetiniń otyrysynda «Qazaqstan balalary» 2026–2030 jyldarǵa arnalǵan tujyrymdamasy bekitildi.
Osyǵan deıán «Qazaqstan balalary» biryńǵaı baǵdarlamasy ázirlenip jatqany týraly jazdyq.