Qazaqstanda keıingi úsh jylda 41 IT mektep ashyldy

ASTANA. QazAqparat – Keıingi úsh jylda Qazaqstanda 41 IT mektep ashyldy. Al, bıyldyń basynan beri olarda 55 myńnan astam oqýshy oqyp jatyr. Bul – 2021 jylmen salystyrǵanda 3 myńǵa kóp. Bul týraly QazAqparat Oqý-aǵartý mınıstrliginiń baspasóz qyzmetine silteme jasap habarlaıdy.

ІT mektepter zamanaýı qural-jabdyqtarmen jáne robototehnıka kabınetterimen jabdyqtalǵan. Sondaı-aq, oqýshylar úshin balalarda tsıfrly bilim men daǵdylardy damytýǵa baǵyttalǵan arnaıy bilim berý baǵdarlamalary ázirlendi.

«Oqý-aǵartý mınıstrligi bilim salasyndaǵy tsıfrlandyrýǵa kóp kóńil bólip otyr. Bizdiń mektepter elektrondy qyzmetterdi paıdalanady, onlaın olımpıadalar, onlaın jarystar ótkizedi, qujattar elektrondy formatta da qabyldanady. Jýyrda elimizde ótken TMD-ǵa múshe memleketterdiń sezinde áriptesterimiz tsıfrlandyrý bilim berý úderisterine qalaı engizilip jatqanyn aıtty. Árıne, biz balalardy tsıfrlandyrýǵa úıretýdi qoldaýymyz kerek. Ol úshin ІT mektepterdi keńinen ashýdy qolǵa alyp otyrmyz. ІT mektepterdiń ereksheligi – ІT tehnologııalar salasyndaǵy mamandaný, erte profıldeý, robototehnıka men baǵdarlamalaýdy tereńdetip oqytý, 3D modeldeý. Jyl saıyn IT mektepterdiń sany arta beredi», - dedi Oqý-aǵartý mınıstrligi Orta bilim komıtetiniń tóraǵasy Gúlmıra Kárimova.

Búgingi tańda ІT mektepterde oqıtyn balalar jalpy bilim beretin pánder men robototehnıka boıynsha respýblıkalyq jáne halyqaralyq olımpıadalar men ǵylymı jobalar baıqaýlaryna belsendi túrde qatysyp júr. Bıyl Indonezııada ótken ınformatıkadan halyqaralyq olımpıadada (IOI) oqýshylarymyz 2 kúmis jáne 2 qola medal jeńip aldy. Qazaqstan atynan bedeldi olımpıadaǵa 4 oqýshy qatysty. Oqýshylarymyz álemniń 90-ǵa jýyq eliniń 350-den astam qatysýshysymen básekelesip, júldeli oryndarǵa ıe boldy.