Qazaqstanda keıbir qurylys kompanııalaryna jeńildik beriledi

ASTANA. KAZINFORM – Elimizde isine jaýapty jáne zańǵa qatań baǵynatyn qurylys kompanııalaryna qoıylatyn talaptar jeńildeıdi. Tolyǵyraq Ónerkásip jáne qurylys mınıstri Qanat Sharlapaev aıtyp berdi.

«Búginde 160 qurylys obektisinde jumystar zańǵa sáıkes júrip jatyr. Májilistegi «Turǵyn úı qurylysyna úlestik qatysýdy jetildirý týraly zań jobasy aıasynda zańǵa saı jumys isteıtin qurylys kompanııalaryn yntalandyrý maqsatynda tıisti sharalardy qarastyrý kózdelip otyr», - dedi Qanat Sharlapaev Úkimet otyrysynda. 

Osylaısha jaýapty jáne tájirıbeli qurylys kompanııalaryna qoıylatyn talaptar jeńildetilmek. 

«Atap aıtqanda, qurylys jumystary úshin qajetti jalpy somanyń ýákiletti kompanııa esebinde bolý úlesi 10 paıyzǵa qysqartylady. Sonymen qosa biryńǵaı operatordyń kepildigin alý kezinde qujattar tizbesi 2 ese azaıady (qazir 43 qujat). Odan bólek ýákiletti kompanııanyń shyǵysyn ońtaılandyrý maqsatynda qosymsha valıýtalyq jáne depozıttik shottar ashý quqyǵy beriledi», - deıdi vedomstvo basshysy. 

Buǵan deıin Q. Sharlapaev mamyrda jańa ıpotekalyq turǵyn úı baǵdarlamasynyń iske qosylatynyn aıtty. 

Sondaı-aq, mınıstr úıin sý basqan turǵyndardyń shyǵyny qalaı óteletinin túsindirip ótken edi.