Qazaqstanda keıbir bankterdiń janynan sharıǵatqa sáıkestik jónindegi keńester qurylady

ASTANA. KAZINFORM – Qarjy naryǵyn retteý jáne damytý agenttiginiń tóraıymy Mádına Ábilqasymova Májiliste ıslam bank tásilimen qyzmet kórsetetin bankterdiń jumysy qalaı retteletinin aıtty.

- Búgingi kúni Qazaqstanda ıslamdyq bank qyzmetin júzege asyrýǵa jeke ıslam bankin qurý arqyly ǵana jol beriledi. 

Qazir Qazaqstanda eki ıslam banki jumys isteıdi – sheteldik «Abý-Dabı kommertsııalyq banki» jáne qazaqstandyq «Zaman» banki. Olardyń bank júıesiniń aktıvteri men kredıttik portfelindegi jıyntyq úlesi 0,5%-dan az.

Zań jobasynda ámbebap bankterge qolda bar lıtsenzııasy sheńberinde ıslamdyq bank operatsııalaryn «ıslamdyq terezeler» arqyly júzege asyrý quqyǵyn berý kózdeledi, - dedi ol. 

Ol úshin Birikken Arab Ámirlikteri, Malaızııa, Pákistan, Bahreın, Kýveıt, Katar jáne Indonezııada keńinen qoldanylatyn «ıslamdyq terezeler» modelin paıdalaný usynylyp otyr.

- «Islamdyq terezeler» modeli bankterge jeke bankti qurmaı, óz qurylymynda arnaıy bólimsheler qurý arqyly ıslamdyq ónimderdi usynýǵa múmkindik beredi. Islamdyq qarjynyń ereksheligin eskere otyryp, ıslamdyq qyzmetti uıymdastyrýshylyq turǵydan oqshaýlaý, aktıvter men mindettemelerdi bólek esepke alý jáne basqarý, jeke qyzmetkerlerdi bólý, sondaı-aq qarjy ónimderin bekitetin jáne aýdıt júrgizetin sharıǵatqa sáıkestik jónindegi keńestiń bolýy kózdelgen, - dedi agenttik basshysy.

Aıta keteıik,  Ulttyq bank pen Qarjy naryǵyn damytý jáne retteý agenttigi Májiliste bankter týraly zań jobasy tanystyrdy.