Qazaqstanda keıbir salalar boıynsha qyzmet kórsetý quny qymbattady
ASTANA. QazAqparat – Sport salasy boıynsha qyzmet kólemi 76,8 mlrd teńgeni quraıdy. Bul ótken jylmen salystyrǵanda 36,1 paıyzǵa artyq, dep habarlaıdy QazAqparat Finprom.kz resýrsyna silteme jasap.
Demalys pen oıyn-saýyqty uıymdastyrý salasyndaǵy qyzmetter quny 177,9 mlrd teńgege jetti. Bir jyl burynǵyǵa qaraǵanda 91,6%-ǵa artyq. Halyq esebinen kórsetiletin qyzmetter kólemi 74%.
Aýyldyq jerlerde sport salasynda kórsetilgen qyzmetter kólemi 4 mlrd teńgege shyqty. Al demalys jáne oıyn - saýyq salasynda 21,6 mlrd teńgeni qurady.
Jergilikti bıýdjetterdiń mádenıetke, sportqa, týrızmge jáne aqparattyq keńistikke jumsaǵan shyǵystary birinshi jartyjyldyqtyń qorytyndysy boıynsha 214,8 mlrd teńgege jetti, jyldyq ósim 39,6%.
Óńirler boıynsha jergilikti bıýdjet shyǵystarynyń eń kóp kólemi Túrkistan oblysynda tirkelgen. Atalǵan óńirde 27,1 mlrd teńge, jyldyq ósim-56% qurap otyr. Kóshbasshylar úshtiginde Almaty (20,5 mlrd teńge, ósim 2 ese) jáne Qaraǵandy (18,4 mlrd teńge, oǵan qosa 29,5%) oblystary bar. Eń tómengi kórsetkishter Mańǵystaý oblysynda baıqaldy. Barlyǵy 6,4 mlrd teńge, bul bir jyl burynǵyǵa qaraǵanda 25,6%-ǵa artyq.
Almatyda mádenıet, sport, týrızm jáne aqparattyq keńistikke bólingen jergilikti bıýdjet shyǵyndary bir jylda 53,9%-ǵa, 18 mlrd teńgege deıin, ShQO-da 13,9%-ǵa, ıaǵnı 13 mlrd teńgege ósti.
Bıyl tamyz aıynyń qorytyndysy boıynsha demalys jáne sporttyq is-sharalar salasyndaǵy qyzmetterdiń baǵasy bir jylda 9,4%-ǵa ósti. Onyń ishinde mýzyka oqytý boıynsha sabaqtar 5,7%-ǵa, basseınder (abonement) qyzmetteri 11,3%-ǵa, jattyǵý zaldary qyzmetteri (abonement) 9,7% - ǵa artqan. Odan bólek, mektep jasyndaǵy balalarǵa arnalǵan sport sektsııalaryndaǵy sabaqtar 5,9%-ǵa, balalarǵa arnalǵan attraktsıondar qyzmetteri 14,4%-ǵa qymbattady.
Óńirler boıynsha baǵanyń eń úlken jyldyq ósýi Atyraý oblysynda 27,5%-ǵa tirkeldi. Odan ári Almaty (22,6%) jáne BQO (21%) bar. Eń tómengi kórsetkish Aqtóbe oblysynda baıqalyp, 1,7%-dy qurap otyr.
