Qazaqstanda Kenııanyń saýda haby ashylady
ASTANA. KAZINFORM - Bul týraly Memleket basshysy Qasym-Jomart Toqaev «Qazaqstan-Kenııa» bıznes forýmynda aıtty.
Jıynda Prezıdent aýyl sharýashylyǵy men azyq-túlik qaýipsizdigi salasyndaǵy yntymaqtastyqty taǵy bir basym baǵyt retinde atady.
– Qazaqstan negizgi azyq-túlik daqyldaryn óndiretin álemdegi kóshbasshy elderdiń biri sanalady. Afrıkadaǵy joǵary suranysty eskere otyryp, Sizdiń elińizge bıdaı eksporttaýǵa múddelimiz. Al Kenııanyń sháıi, kofesi men gúli álemge áıgili. Sondyqtan biz Qazaqstanda Kenııa saýda habyn ashýǵa nıettimiz. Sol arqyly Sizdiń eldiń bıznesi Eýrazııa naryǵyna dendep ene alady. Sonymen qatar agrarlyq saladaǵy birlesken bilim berý bastamasyn quptaımyz. Kenııalyq stýdentter men mamandardy oqý oryndarymyzda qýana qarsy alamyz, – dedi Memleket basshysy.
Prezıdenttiń aıtýynsha, taý-ken ónerkásibi jáne geologııalyq barlaý ekijaqty yqpaldastyqtyń mańyzdy baǵyty sanalady.
– Qazaqstan men Kenııada sırek kezdesetin elementterdiń jáne asa mańyzdy mıneraldardyń mol qory bar. Taza energııaǵa kóshý, tsıfrlyq tehnologııa jáne ozyq óndiris salalarynda jahandyq suranystyń ulǵaıýyna baılanysty atalǵan qazba baılyqtardyń mańyzy arta tústi. Osy oraıda geologııa, barlaý, óndirý jáne óńdeý baǵytynda ózara tıimdi yntymaqtastyq qurýǵa aıtarlyqtaı múmkindik bar ekenin kórip otyrmyz. Qazaqstan osy saladaǵy bilimi men tájirıbesin bólisýge daıyn. «Samuryq Qazyna» men NAMICO kompanııasy arasynda jasalǵan Kenııadaǵy ınvestıtsııalyq jobany júzege asyrý týraly kelisimdi quptaımyz. Onyń aıasynda taraptar jer qoınaýyn paıdalaný, geologııalyq barlaý, baǵalaý jáne ilgeriletý jumystarymen aınalysady. Bul qujat taý-ken óndirisi sektoryndaǵy birlesken jobalardy iske qosýǵa berik negiz qalaıdy, – dedi Qasym-Jomart Toqaev.
Osyǵan deıin Qasym-Jomart Toqaev pen Ýılıam Rýto «Qazaqstan-Kenııa» bıznes forýmyna qatysqany týraly jazdyq.
