Qazaqstanda ken oryndary qory taıaý bolashaqta taýsylady
«Paıdaly qazbalardyń kóptegen túrleriniń rastalǵan qory boıynsha elimiz álemniń jetekshi elderiniń alǵashqy ondyǵyna kiredi. Bul rette paıdaly qazbalardy qarqyndy óndirýge baılanysty geologııa salasynyń aldynda turǵan basty syn-qateri - qorlardyń tolyqtyrý deńgeıiniń tómendigi. Óndirýdiń qazirgi deńgeıin alsaq, tıisti tolyqtyrýsyz kóptegen ıgeriletin ken oryndarynyń qory taıaý bolashaqta taýsylady. Osyǵan baılanysty, jer qoınaýyn memlekettik geologııalyq zertteýdi jandandyrý talap etiledi. Bul – keıinnen jer qoınaýyn paıdalanýǵa berý úshin perspektıvaly alańdar men obektilerdi anyqtaýdyń negizgi ádisi», - dedi Ekologııa mınıstri Úkimet otyrysynda.
Onyń aıtýynsha, 2020-2022 jyldary memlekettik salymdar kólemi 30 mlrd teńgeni quraǵan. Bul rette, sońǵy jyldary memlekettik ınvestıtsııalardyń ulǵaıýy baıqalýda.
«Sonymen birge, Qazaqstanda geologııalyq barlaýǵa 1 sharshy kılometrge salynatyn memlekettik ınvestıtsııalar kórsetkishi óte tómen. Bizde ol 11 AQSh dollary bolsa, Aýstralııada – 167 dollar, Kanadada – 203 dollar. Álemdik tájirıbe kórsetip otyrǵandaı, ınvestorlar óz qarajatyn memleket esebinen boljamdy resýrstary bar, perspektıvaly ýchaskeler bazasy qalyptasqan jumystardyń erte satylaryn júrgizgen nemese júrgizý ústindegi elderde ken oryndaryn barlaýǵa salady», - dedi S. Brekeshev.
Osyǵan baılanysty, Prezıdent tapsyrmalaryn oryndaý úshin geologııa salasynyń birqatar negizgi mindetteri bar.
«Birinshi – geologııalyq zerdelenýdi arttyrý jáne perspektıvaly ýchaskelerdi anyqtaý. Ekinshi – geologııa salasynyń ınfraqurylymy men geologııa ǵylymyn damytý. Úshinshi - óndiristik-tehnologııalyq protsesterdi tsıfrlandyrý jáne avtomattandyrý. Tórtinshi – geologııalyq zertteýdiń ınvestıtsııalyq tartymdylyǵyn arttyrý, mıneraldyq-shıkizat bazasyn molaıtý úshin zańnamany jetildirý. Biz geologııa salasyn damytýdyń 2025 jylǵa deıingi tujyrymdamasyn ázirledik, onda joǵaryda atalǵan máselelerdiń sheshimi kórinis tapty», - dedi S. Brekeshev.
