Qazaqstanda ken men kontsentrat eksportyn baqylaýdyń jańa tetigi engizilýi múmkin

ASTANA. KAZINFORM — Quramynda baǵaly metaldar bar shıkizat aınalymyn baqylaýdyń jańa tetigi engizilýi múmkin. Bul týraly Ónerkásip jáne qurylys mınıstri Ersaıyn Naǵaspaev Májilis depýtatynyń saýalyna joldaǵan jaýapta aıtty. 

— Qazir mınıstrlik shıkizat taýarlaryn áketýdi baqylaý tetigin jetildirý úshin akkredıttelgen zerthanalardyń tizbesin qalyptastyrý boıynsha jumys júrgizip jatyr. Sondaı-aq. «Ulttyq tehnologııalyq boljaý ortalyǵy» RMK bazasynda kendi, tehnogendi shıkizattaǵy sırek jáne jerde sırek kezdesetin metaldardy anyqtaıtyn óńirlik zertteý ortalyǵyn qurý qolǵa alyndy. Zerthananyń negizgi artyqshylyǵy halyqaralyq akkredıtatsııanyń bolýy, álemdik ozyq standarttarǵa sáıkestik, zamanaýı ádister men tásilderdi qoldaný, joǵary tehnologııalyq jabdyqtar jáne ınnovatsııalyq tehnologııalar bolady, — dep jazylǵan mınıstrdiń jaýabynda.

Aıta ketý kerek, álem nazary Qazaqstanǵa sırek metaldar kózi retinde aýǵan kezeńnen bastap elde asa qundy metaldar ken men kontsentrat túrinde zańsyz eksporttalyp jatqany aıyptaýlar kóbeıip keledi. Buǵan deıin depýtat Azat Perýashev «Qazaqmystyń» sırek metaldardy «ken» retinde syrtqa shyǵaryp jatqany qanshalyqty ras ekenin surap, saýal joldaǵan bolatyn. 

Oǵan Ónerkásip jáne qurylys mınıstrligi qasań jaýap qaıyrǵan. 

Ol jaýapqa kóńili tolmasa kerek, bul jolǵy saýaldyń bastamashysy da Azat Perýashev.

— Mınıstrlik quramynda baǵaly metaldar bar shıkizat taýarlarynyń aınalymyn baqylaýdyń qosymsha tetigin engizý máselesin pysyqtaıdy, — dep jazady Ersaıyn Naǵaspaev.