Qazaqstanda «kemelerdiń halyqaralyq reestri» ınstıtýty engiziledi
ASTANA. 20 naýryz. QazAqparat - Elimizde «kemelerdiń halyqaralyq reestri» ınstıtýty engiziledi. Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine kólik máseleri boıynsha ózgerister men tolyqtyrýlar engizý týraly» zań jobasy boıynsha baıandaǵan Kólik jáne kommýnıkatsııa mınıstri Asqar Jumaǵalıev osylaı málim etti.
«Búgingi tańda qazaqstandyq sý kólikteri, kemeler tek munaı ónimderin tasymaldaıdy. Qurǵaq jáne paromdyq júkterdi tasymaldaýdyń barlyǵy sheteldik kompanııalar úlesinde tur. Soǵan oraı, paromdyq parkti ulǵaıtý kózdeledi. Otandyq saýda flotynyń básekege qabiletin arttyrý úshin «kemelerdiń halyqaralyq reestri» ınstıtýty usynylady», - deıdi mınıstr A. Jumaǵalıev.
Onyń aıtýynsha, bul arqyly otandyq tasymaldaýshylar salyq jáne baj jeńildikterine ıe bolady. Mınıstrdiń sózine qaraǵanda búgingi tańda júzý qyzmetiniń quramynda 2 myńǵa jýyq adam qyzmet atqarsa, sonyń ishindegi Qazaqstan azamaty 50 paıyzdan aspaıdy. Al komandalyq quramdaǵylardyń nebári 28 paıyzy ǵana qazaqstandyqtar eken. «Kadr tapshylyǵy máselesin sheshý úshin bilim berýdi sertıfıkattaý usynylady. Al kýrsanttardy tájirıbeden ótkizýdi keme ıelerine mindetteıtin bolamyz», - dedi A. Jumaǵalıev.
