Qazaqstanda kelisi jyldan bastap aýyl ákimderi saılanady

NUR-SULTAN. QazAqparat – 2021 jyly Qazaqstanda aýyldyq okrýgter ákimderiniń tikeleı saılaýy ótkiziledi. Bul týraly Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Joldaýyn iske asyrý jónindegi Jalpyulttyq is-sharalar josparynda atalyp ótken, dep habarlaıdy QazAqparat.

«Azamattardyń memleketti basqarý isine qatysýy» bóliminde Qazaqstan Respýblıkasynyń zańnamasyna aýyldar, kentter, aýyldyq okrýgter ákimderiniń tikeleı saılaýyn ótkizýge qajetti ózgerister men tolyqtyrýlar engizý eskerilgen.

Sonymen qatar, ókilettikteri 2021 jyly aıaqtalatyn aýyldar, kentter, aýyldyq okrýgter ákimderiniń tikeleı saılaýyn 2021 jyly ótkizý josparlanǵan.

Jergilikti ózin-ózi basqarýdy damytýdyń jańa tujyrymdamasyn ázirleý de qamtylǵan. Onda myna qadamdar qarastyrylǵan:

- memlekettik basqarý deńgeıleri arasynda ókilettikterdi bólý;

- jergilikti memlekettik basqarý jáne jergilikti ózin-ózi basqarý organdary ókilettikteriniń arajigin kezeń-kezeńmen ajyratý;

- jergilikti bıýdjetterdi bekitý protsesine baqylaýdy kúsheıtý, onyń ishinde ınfraqurylymdyq jáne áleýmettik bastamalarǵa baǵyttalǵan qogamdyq mańyzy bar shyǵystar bóliginde onlaın-suraý júrgizýdi qoldanýdy qosa alǵanda, qoǵamdyq saraptamadan ótý tetikteri arqyly kúsheıtý;

- aýyldyq okrýgterdiń múliktik quqyqtaryn keńeıtý jáne kiristerin ulǵaıtý arqyly jergilikti ózin-ózi basqarýdyń qarjylyq múmkindikterin kúsheıtý, bul «halyq qatysatyn bıýdjetterdi» damytýdyń kelesi kezeńi bolýy tıis;

- ortalyq - óńir qarym-qatynasy ǵana emes, qarajattyń óńir ishinde bólinýi de eskeriletin, óńirlerdi bıýdjettik qarjylandyrý modelin aıqyndaý;

- jergilikti ózin-ózi basqarý organdarynyń, jıyndar men jınalystardyń mártebesin kóterý, jergilikti jerdegi ózekti problemalarǵa qatysty olardyń pikirin aýdandyq máslıhattar naqty sheshimder qabyldaý úshin eskerýi tıis;

- tekserý komıssııalaryn kúsheıtý.