Qazaqstanda kelesi jyly tuńǵysh ret buqtyrylǵan túıe eti óndiriledi
ASTANA. QazAqparat - Almaty oblysyndaǵy «Kún nury» JShS kelesi jyldan bastap buqtyrylǵan túıe etiniń konservilerin naryqqa shyǵarýdy kózdep otyr, dep habarlaıdy «QazAqparat» HAA tilshisi.
«Almaty oblysyndaǵy Aqshı degen jerdegi «Dáýlet-Beket» degen sharýa qojalyǵynda 5 myń túıe bar. Ondaǵy sharýa qojalyqtyń basshylyǵy bizdiń kásiporynǵa jylyna 500 túıe berýge daıyn ekenin aıtyp otyr. Kásiporynnyń bastapqy jumysyn 500 túıe qanaǵattandyrady degen oıdamyz. Qazaqstanda buqtyrylǵan túıe eti birinshi ret óndirilgeli otyr. Saýd Arabııasynda mundaı kásiporyn bar. Biraq, bizdiń jańalyǵymyz - túıe etin tutynýshylarǵa arnaıy qaptamalar men konservilerde usynyp otyrǵanymyz. Ónimniń jaramdylyq merzimi - 24 aı», - deıdi joba jetekshisi Juldyz Súleımenova.
Tyń ónimniń baǵasy áli belgilenbegen. Biraq, túıe etiniń baǵasy naryqta sıyr etinen eki ese arzan bolǵandyqtan, óndirýshiler osy aralyqtan asyp ketpeýdi kózdeıdi.
«Kóbinese túıe etin áskerı bólimderge usynamyz. Olarda qazirgi tańda qyzyǵýshylyq bar. Bizdiń naryqta túıe eti ımportta kelip jatqan joq. Bul da óz kezeginde bizdiń ónimimizge suranys paıda bolar degen kóp úmittiń biri», - deıdi Juldyz Súleımenova
Aıta keterligi, búgin Astanada «Ǵylym men bıznesti biriktirý quraly retinde tehnologııalardy kommertsıalızatsııalaý» taqyrybynda forým ótkeli jatyr. Forýmaǵa qatysýshylar ǵylymı jáne ǵylymı-tehnıkalyq qyzmet nátıjeleriniń damýyndaǵy ózekti máselelerdi talqylap, ǵylym men bıznestiń qarym-qatynasyn tájirıbe júzinde iske asyrý joldaryn qarastyrmaq.
