Qazaqstanda kedeılik deńgeıi tómendep keledi - Úkimet saǵaty
ASTANA. 2 sáýir. Qazaqstanda kedeılik deńgeıi tómendep keledi. Atap aıtqanda, atalǵan kórsetkish 2001 jylmen salystyrǵanda 7 esege, al 2006 jylmen salystyrǵanda 3 esege tómendegen.
Búgin Parlament Májilisinde ótken Úkimet saǵatynda depýtattar saýalyna jaýap bergen Statıstıka agenttiginiń tóraǵasy Álıhan Smaıylov osylaı málim etti.
«Degenmen qalalyq jáne aýyldyq jerlerdegi, sondaı-aq aımaqtar arasyndaǵy kedeılik deńgeıleriniń aıyrmashylyǵy aıtarlyqtaı. Mysaly, aýyldyq jerlerde kedeılik deńgeıi qalalyq jerlerge qaraǵanda 3 esege deıin joǵary bolsa, aımaqtar arasyndaǵy aıyrmashylyq 5 esege deıin. Degenmen jalpy alǵanda kedeılikke qarsy oń ózgerister baıqalýda. Mysaly, Qazaqstandaǵy halyqtyń arasyndaǵy eń baı jáne eń kedeı adamdardyń arasyndaǵy tabys aıyrmashylyqtary sońǵy 10 jylda 1,5 esege tómendedi. Osynyń ózi jurtshylyqtyń jaǵdaıynyń jaqsarǵanyn kórsetedi»,-dedi Á. Smaıylov.
Tórǵanyń aıtýynsha, Qazaqstandaǵy kedeıler kórsetkishi 6,5 paıyzdy quraıdy. Bul kórsetkish Belarýsta 5,2, Reseıde 12,6 paıyz.
«Alaıda, ár elde óziniń memlekettik kedeılik shegi árqalaı. Mysaly, Qazaqstanda bul shek 13487 teńgeni quraıdy. Al reseıde bul 2 ese joǵary - 27587 teńge bolsa, Qyrǵyzstanda 1314 teńge»,-dedi Á. Smaıylov.
