Qazaqstanda kedendik rásimdeýdiń jańa aımaqtary salynady

ASTANA. QazAqparat - Qazaqstanda kedendik rásimdeýdiń jańa aımaqtary salynady. Bul týraly búgin Dúnıejúzilik keden uıymynyń eýropalyq óńiriniń kedendik qyzmetteri basshylarynyń konferentsııasynda QR Premer-Mınıstriniń birinshi orynbasary Baqytjan Saǵyntaev málim etti.

Ótken aıdyń sońynda kedendik ákimshileýdi jeńildetý boıynsha Premer-Mınıstrdiń buıryǵy shyqqanyn eske salyp ótken ol, onyń aıasynda lıtsenzııa berý merzimin qysqartý, shekaralyq baqylaý organdary qyzmetterin ońtaılandyrý, sondaı-aq úderisti avtomattandyrý men aqparattyq júıelerdiń ıntegratsııasy qamtylǵan.

«Biz atalǵan máselede túrli elderdiń aldyńǵy qatarly tájirıbesin zerdeledik jáne qazirgi kezde kedendik rásimdeýdiń jańa aımaqtaryn salý boıynsha qujatnama daıyndalyp jatyr. Eger de bizdiń qazirgi qoldanystaǵy nysandarǵa toqtalatyn bolsaq, olar kedendik aımaq arqyly taýarlardyń jyldam rásimdelip, ótkizilýine yqpal etpeı otyr. Sondyqtan da bul máselelerdiń barlyǵy taýarlardy kedendik aıqyndaý boıynsha qyzmetterdiń tolyq shoǵyryn usynýdy, ınfraqurylymdy jaqsartýdy, qurylysty, onyń ishinde sapaly avtojoldardy qarastyrady»,-dedi B. Saǵyntaev.

Osy rette ol Aqtaý portynda kedendik rásimdeý ýaqyty 12-15 saǵyttan 2 saǵatqa deıin qysqarǵanyn eske saldy. Sonymen qatar bundaı jumystar «Qorǵas» kedendik beketinde de júrgiziledi.