Qazaqstanda qazirgi zamanǵy saýda alańdarynyń jetispeýshiligi problemasy saqtalyp otyr

Bul týraly búgin QR Parlamenti Májilisinde «QR keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Indýstrııa jáne saýda vıtse-mınıstri Tımýr Jaqsylyqov málim etti, dep habarlaıdy QazAqparat.

«Qazirgi ýaqytta elimizde zamanǵa saı saýda alańdarynyń jetispeýshiligi áli de ózekti problema bolyp tabylady. Bunyń ózi saýda nysandary ıeleriniń, saýda nysandary men jaldaý aqysynyń qymbattaýyndaǵy básekege qarsy áreketterine ákep soǵady ári aqyr aıaǵynda ótkiziletin taýar qunyna da áser etedi», dedi vıtse-mınıstr.

Jalpy, Statıstıka agenttiginiń málimetterine qaraǵanda, halyqtyń saýda alańdarymen, onyń ishinde saýda naryqtarynda qamtamasyz etilýi respýblıka boıynsha bir myń adamǵa 111,7 sharshy metrdi quraıdy. Al bundaı eń az qamtylý Qyzylorda oblysynda - 48,8 sharshy metr, Ońtústik Qazaqstan oblysynda - 40 sharshy metr, Jambyl oblysynda - 59,3 sharshy metrdi qurasa, eń joǵary qamtylý Shyǵys Qazaqstan oblysynda -186,6 sharshy metr, Astana qalasynda - 198,7 sharshy metr jáne Almaty qalasynda - 260 sharshy metrge teń. Salystyrmaly túrde alyp qaraǵanda, qazirgi saýda alańdary turǵyndarǵa Frantsııada 1 myń 450 sharshy metrdi, polshada 350 sharshy metrdi, Chehııada - 200 sharshy metrdi quraıdy.

Budan basqa, álemniń kóptegen elderinde saýda alańdarymen qamtamasyz etýge qatysty arnaıy normatıvter qabyldanǵan. Qazaqstanda bundaı normatıvter joq.