Qazaqstanda qazaqsha Vıkıpedıany damytatyn uıym quryldy
ALMATY. 16 maýsym. QazAqparat /Erbol Azanbek/ - 16 jeltoqsanǵa deıin Vıkıpedıa ashyq entsıklopedııasyndaǵy qazaqsha maqalalar sany 200 myńǵa jetedi. Bul úshin Qazaqstanda «Wikibilim» atty arnaıy qoǵamdyq qor quryldy. Búgin Almatyda atalǵan qor ókilderi arnaıy baspasóz máslıhatyn ótkizip, bolashaq josparlarymen tanystyrdy.
«Ǵalamtordan qazaq tilinde kez-kelgen salada málimetterdi tabý qıyn. Arnaıy qoǵamdyq qor qurý arqyly biz osy máseleni sheshýdi qolǵa alǵandy jón kórdik. Basty maqsatymyz - qazaqsha vıkıpedıadaǵy maqalalar sanyn tez arada kóbeıtý ǵana emes, eń bastysy sapaly mazmun túzý. Sonymen qatar eriktilerden quralǵan qazaqsha vıkıpedıashylar qaýymdastyǵyn qalyptastyrý. Bul qaýymdastyq vıkıpedıaǵa túrli maqalalar salyp, pikir almasyp, túzetip, tolyqtyryp otyrady. Bul arqyly jyl saıyn qazaqsha kontent kóbeıe bermek. Bizdiń jumysymyz tek bıyl jyldyń aıaǵyna 200 myń maqala qalyptastyrýmen shektelmeıdi. Biz qoǵamǵa Vıkıpedıanyń paıdasyn, maqsatyn túsindirýden, nasıhattaýdan jalyqpaımyz. Bizdiń jumysymyz bastalǵan kezde qazaqsha Wikipedia-da 8,5 myńnan astam maqala bolǵan. Qazir kún saıyn 500 maqala qosylyp jatyr. Jalpy sany 25 myńnan asty»,- deıdi «Wikibilim» qoǵamdyq qorynyń quryltaıshysy Raýan Kenjehanuly.
Onyń aıtýynsha bul maqsatty qoǵam arasynda keńinen taratý úshin «Samruq Qazyna» UÁQ-y men «Nokıa» kompanııasy bas demeýshilik tanytyp otyr. Qazaqsha kontentti kóbeıtý úshin «Qazaq entsıklopedııasy» da yqylas tanytqan. Búgin baspasóz máslıhatynda Qazaq entsıklopedııasynyń bas dırektory Baýyrjan Jaqyp osy ýaqytqa deıin jaryq kórgen entsıklopedııadaǵy maqalalardy qazaqsha vıkıpedıaǵa beretindikterin jarııalady. Ondaǵy jalpy maqalanyń sany 40-45 myń kóleminde.
Baspasóz máslıhaty barysynda qazaqsha Wikipedia jumysyn úılestirýshi saıt ta tanystyryldy. «www.wikibilim.kz saıty vıkıpedıaǵa maqala salýdy, túzetýdi, aýdaratyn maqalalar týraly aqparattardy berip, qazaqsha vıkıpedıa jumystaryn úılestirip otyrady. Buǵan deıin qazaq tilindegi vıkıpedıa jumysy damyǵan joq. Kóp adamdardyń ony qalaı qoldaný týraly aqparaty joq. Saıttan qazaqsha vıkıpedıa jumysy týraly barlyq aqparatty alýǵa bolady»,- deıdi R.Kenjehanuly. Ol sondaı-aq qazaqsha vıkıpedıany damytý bir uıym nemese bir memlekettiń emes, jalpy qoǵamnyń isine aınalsa degen oı bildirdi.
