Qazaqstanda Kaz-Nedra geoaqparattyq júıesi iske qosylady
Bul júıe jeke jáne zańdy tulǵalarǵa jer qatynastary men jer qoınaýyn paıdalaný salasyndaǵy aqparatqa qoljetimdilik beretin bolady. Onyń taǵy bir fýnktsııasy - osy salalarda kórsetiletin memlekettik qyzmetterdi avtomattandyrý.
Bul jobany Tsıfrlyq damý mınıstri Baǵdat Mýsın men Ekologııa mınıstri Serikqalı Brekeshev jan-jaqty talqylady.
Qazirgi ýaqytta mınıstrlik jobany iske asyrý boıynsha Jol kartasyn ázirlep, bekitti, jer qoınaýyn paıdalanýshylardyń bıznes-protsesterin avtomattandyrý boıynsha biryńǵaı tásilderdi aıqyndady.
Joba birden birneshe vedomstvonyń, sonyń ishinde Ekologııa, geologııa jáne tabıǵı resýrstar, Qorǵanys, Aýyl sharýashylyǵy, Indýstrııa jáne ınfraqurylymdyq damý mınıstrlikteriniń, sondaı-aq jergilikti atqarýshy organdardyń derekter bazasyn qosýdy kózdeıdi.
Munda erekshe qorǵalatyn tabıǵı aýmaqtar, jer asty sýlary, gıdrotehnıkalyq, ınjenerlik qurylystar jáne t.b. boıynsha derekter saqtalatyn bolady.
Bul rette, TsDIAÓM jobanyń tehnıkalyq bóligin oryndaýdy, onyń ishinde qajetti aqparatty júkteý úshin derekter bazasynyń qurylymyn qurýdy da óz moınyna alady, al tsıfrlandyrý jáne aqparatpen toltyrý, sondaı-aq quqyqtyq alańdy qalyptastyrý salalyq memlekettik organdarda qalady.
«Kaz-Nedra platformasy ashyqtyqty qamtamasyz etedi jáne rásimderdi tsıfrlandyrý arqyly jer qoınaýyn paıdalaný quqyǵyn berýge baqylaýdy kúsheıtýge múmkindik beredi. Munda jer qoınaýy ýchaskelerin izdestirýden, geologııalyq aqparat pen lıtsenzııalar alýdan bastap, jer qoınaýyn paıdalanýshylardyń eseptiligin, onyń ishinde salyq tólemderin qalyptastyrý men tapsyrýǵa deıin birqatar rásimderdi júzege asyrýǵa bolady», - dep atap ótti vedomstvo basshysy Baǵdat Mýsın.
Onyń aıtýynsha, platformany engizý jer qoınaýyn paıdalanýshylar úshin biryńǵaı terezede barlyq rásimder men qyzmetterdi shoǵyrlandyrý arqyly ınvestorlarǵa keshendi servıstik qoldaý kórsetýge yqpal etedi
