Qazaqstanda qaıyrymdylyq jasaǵan adamdarǵa ataq beriledi

NUR-SULTAN. QazAqparat – Elimizde jaqsylyq jasap, qaıyrymdylyqpen aınalysyp júrgen azamattarǵa qurmetti ataq berilmek. Bul týraly QR Aqparat jáne qoǵamdyq damý mınıstrligi azamattyq qoǵam isteri komıtetiniń tóraǵasy Madııar Qojahmet málim etti, dep habarlaıdy QazAqparat tilshisi.

«Qaıyrymdy is jasaǵan adamǵa nemese uıymǵa qurmetti ataq beriledi. Qazir onyń erejesi men talaby ázirlenip jatyr. Qaıyrymdylyq jasaǵany úshin beriletin qurmetti ataq jyl saıyn baıqaý negizinde taǵaıyndalady. Ataq jeke adamǵa nemese uıymǵa berilýi múmkin. Kisiniń nemese uıymnyń jasaǵan ıgi isterin arnaıy komıssııa qarap, nátıjesinde qurmetti ataq berý nemese bermeý týraly sheshim qabyldanady», - dedi Madııar Qojahmet Ortalyq kommýnıkatsııalar qyzmeti alańynda ótken baspasóz máslıhatynda.

Komıtet basshysynyń aıtýynsha, qaıyrymdy jandarǵa beriletin qurmetti ataq memleket tarapynan kórsetilgen alǵystyń belgisi.

Aıta ketsek, búgin Ortalyq kommýnıkatsııalar qyzmeti alańynda QR Aqparat jáne qoǵamdyq damý mınıstrligi ázirlegen «Keıbir zańnamalyq aktilerine volonterlik qyzmet, qaıyrymdylyq, memlekettik áleýmettik tapsyrys, strategııalyq áriptestikti iske asyrýǵa memlekettik tapsyrys, úkimettik emes uıymdarǵa arnalǵan granttar men syılyqtar, dárilik jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» Zań jobasy ortaǵa salyndy.

Mınıstrlik ókiliniń málimetinshe, atalǵan zań jobasyn ázirleýde jan-jaqty talqylaýlar júrgizilip, jurtshylyqtyń usynystary eskerildi.

Zań jobasy úsh negizgi bloktan turady: volonterlik qyzmet, qaıyrymdylyq jáne úkimettik emes uıymdardy memlekettik qoldaý.

Buǵan deıin qaıyrymdylyq maqsatynda halyqtan jylý jınaıtyn blogerler endi kómekke muqtaj kisimen nemese uıymmen kelisimshart jasasýǵa mindetti ekeni týraly habarlaǵan edik.